Amparo Larrañaga y José Luis Gil alleguen al Xovellanos con “Ser o no ser”

El Teatru Xovellanos va acoyer trés representaciones de la obra “Ser o no ser”. Les feches escoyíes son el 6 y 7 d’agostu, a les 20:30, na primer xornada, y a les 20 y 22:30 nel casu de la segunda. Na obra, de 90 minutos de duración, Joseph Tura (“esi gran, pergrande actor”, tal que él se autodefine venga o non a cuentu) y la guapísima María Tura tán casaos na vida real y na teatral. De fechu son la pareya d’actores más famosos na Polonia de 1939, setiembre pa ser más esactos. Y yá ye mala suerte porque, si esi ye l’añu y esi’l país, Adolf Hitler ta invadiéndolos.

Los Tura y el restu d’actores de la so compañía van vese somorguiaos nuna delirante “representación” de contraespionaxe, díes y veníes pol cuartel xeneral nazi en Varsovia, engaños d’unos contra otros y toos contra toos y, yá puestos a arriesgase, pos meyor faelo a lo grande: suplantar al mesmu Führer. La hestoria de los Tura y la so particular llucha contra’l nazismu titúlase “Ser o no ser” y ye una obra maestra del cine de tolos tiempos y xéneros que robló Ernst Lubitsch en 1942.

Amparo Larrañaga, José Luis Gil, Ángel Chamarro, Diego Martín o Mauro Muñiz de Urquiza, dan vida a la inmortal compañía polaca que, colos nazis a les puertes, van tener qu’ufiertar la meyor representación de les sos vides. Los precios de la butaca, ente los 15 y los 20 euros.