Nel día de güei, el Presidente de l’Academia de la Llingua Asturiana, Xosé Antón González Riaño, aconceyó cola diputada de Xuníes Podemos nel Congresu, Sofía Castañón, pa falar de les posibilidaes presupuestaries de la promoción de la llingua asturiana dientro de los Presupuestos Xenerales del Estáu, que s’alcuentren agora mesmo en tramitación.
A lo llargo del aconceyamientu, sorrayóse la importancia simbólica de que l’Academia, como institución llingüística cimera d’Asturies, cunte dende va tres años con una aportación económica del Estáu. Ello ye una reconocencia esplícita de la identidá llingüística asturiana que, sicasí, habría completase con otres partíes presupuestaries destinaes a encontar, acordies cola Constitución Española, el procesu de recuperación y dignificación llingüística n’Asturies. Uviéu, 28 d’ochobre de 2022