El Conservatorio Municipal Profesional Julián Orbón abrió’l plazu para la inscripción a les pruebes d’accesu a les Enseñances Elementales de Música, destinaes a neños y neñes que cumplieren los 8 años d’edá a 31 d’avientu d’anguaño, 2021. La convocatoria va permanecer abierta hasta’l 11 de xunu.
Les solicitúes podrán presentase de forma telemática, al traviés de la See Electrónica del Conceyu d’Avilés, na dirección https://sedeelectronica.aviles.es/Convocatorias,, o de forma presencial nel Serviciu d’Atención Ciudadana, SAC, de la Casa Consistorial na plaza d’España, o nel edificiu El Focu de Villalegre.
La documentación que tendrán d’axuntar les families va ser l’impresu de solicitú d’inscripción, disponible na mesma see electrónica, y una fotocopia del llibru de familia. Les pruebes van tener llugar a partir del 21 de xunu n’el mesmu conservatorio, na cai Julia de la Riva, 2.
P’amosar les especialidaes ufiertaes, el centru produció un vídeu nel qu’el mesmu alumnáu d’Enseñances Elementales presenta cada preséu, interpretando fragmentos de conocíes cantares de bandes sonores cinematográfiques.
Los preseos que pueden estudiase son: clarinete, contrabaxu, fagó, flauta trevesera, guitarra, oboe, percusión, pianu, saxofón, trombón, trompa, trompeta, tuba, viola, violín y violonchelu.