Un exemplar de la primer edición de Harry Potter y la piedra filosofal, d’especial interés por contener una errata, va ser el protagonista d’una puya en Londres el 9 de payares con un preciu envaloráu de 20.000 llibres (unos 23.000 euros).
Publicada per primer vegada en xunu de 1997 pola editorial Bloomsbury, la primer novela de la saga creada por J.K. Rowling convirtióse rápido nun éxito mundial y esta copia, una de les 500 que fueron impreses, contién un erru na páxina 53 onde apaez repitíu “1 varita” na llista de materiales que Harry tien que llevar a Hogwarts, la escuela onde apriende mata. El fallu, correxíu nes ediciones posteriores, convirtió estos exemplares n’únicos, amontando asina’l so valor económico y simbólico.
El director de la puya, Matthew Haley, asegura que, al ser el primer volume de la saga, Harry Potter y la piedra filosofal tien un valor sentimental especial pa millones de llectores nel mundu y que “la errata sobre la varita d’esta primer edición convirtióse nuna ayalga”. Anque empobinaos a mozos llectores, los llibros del mozu magu, que vendieron unos 500 millones d’exemplares en tol mundu, tamién tuvieron una gran acoyida ente’l públicu adultu.