Esti xueves 29 a les 19:45 hores na sala 3 de los Cines Centro el Festival de Cine de Xixón acoye’l pase de la película “A golpe de tacón”, curtiumetraxe de la directora asturiana Amanda Castro que va repetise mañana vienres 30 a les 17:00 hores nel Centru Municipal Xixón Sur-Pumarín. La película revisa’l papel de les muyeres na fuelga minera de 1962 a partir de les vivencies de les llangreanes Anita Sirgo y la fallecía Constantina Perez, “Tina la de La Xuecara”, que foron deteníes y torturaes durante los episodios del 1962.
Esti curtiumetraxe, que se va proyectar diantro del ciclu “Esbilla”. ta rodáu principalmente en Llangreu y Santa Cruz de Mieres y foi realizáu a partir d’un guión del periodista entreguín Pedro Alberto Marcos, que tamien ye l’autor del testu del primer trabayu cinematográficu d’Amanda Castro “Tierra de guerrilleros”. Nel elencu d’actores de la cinta figuren Cristina Marcos, Lola Herrera, Belen Ponce de León, Fernando Andina y el llangreanu Fran Sariego.