A Caridá celebra’l X Mercáu Tradicional esta fin de selmana

El conceyu d’El Franco celebra esta fin de selmana n’A Caridá la décima edición del so Mercáu Tradicional. El sábadu a partir de les cinco la tarde entamen les actividaes pa los neños pequeños con un taller de manualidaes con barru. A les 6:30 va celebrase’l tercer Concursu de “Tiro con Forcao”. El domingu, a la una la tarde va escenificase’l tratu d’una xata pol grupu de teatru Juan Manuel Méndez.

A partir de les cinco entama una demostración de bolu rodáu a cargu del club de bolos de Lloza (Cuaña), onde va poder participar tola xente que quiera probar. Pa los más pequeños va haber xuegos tradicionales, como la rana.

Nos dos díes del mercáu van poder mercase productos artesanos y vese facer productos tradicionales. L’asociación Xeira va poner tamién un puestu de llibros en gallego-asturianu.

El Mercao Tradicional ta organizáu pol grupu El Cabazo y Plataforma Eonaviega como una recreación del mundu d’enantes y como un homenaxe a los más vieyos y nesta ocasión, a los bolos del conceyu.