La conceyala d’Eventos, Ana Hevia, presentó esti llunes el programa d’actos de la XXXVI Feria del Quesu y el Vinu y de la XXXVII Feria de la Cerámica, qu’entamó ayeri y va seguir desenvolviéndose los díes 20 y 21 de mayu nel Pabellón d’Esposiciones de La Madalena.
Entamada pol Conceyu d’Avilés col sofitu de la Conseyería de Desenvolvimientu Rural y Recursos Naturales del Gobiernu del Principáu d’Asturies y la collaboración de Caxa Rural d’Asturies, estes dos Feries entamaron ayeri vienres 19 de mayu, a les 13 hores. En total van participar 80 espositores (41 queseros, 3 panaderíes, 14 bodegues, vinotecas y enoteques, y 22 ceramistes) procedentes de 10 comunidaes autónomes.
Mientres los trés díes de celebración de les feries, l’aparcamientu esistente frente a la fachada principal de la feria va ser d’usu llibre y gratuitu pal públicu. Na zona esterior van instalase atracciones infantiles y cames elástiques. L’horariu d’apertura al públicu del pabellón va ser de 11 a 23 hores, mientres los trés díes de celebración de les feries.
Tan participando 41 espositores queseros y 3 panaderos. Podrán adquirise y tastiar 21 tipos de quesos artesanales traíos hasta Avilés por queseríes procedentes del País Vascu, Cantabria, Cataluña, Castiella y Llión, Estremadura, Aragón, Galicia y Asturies.
Ente’l públicu asistente va sortease diariamente una cesta de quesos asturianos.
Pela so parte, los 14 espositores rellacionaos col mundu del vinu van dexar la compra y degustación de caldos de casi toles denominaciones d’orixe del país, incluyendo l’asturiana D.O. Cangas.