“Nun tris” estrena’l sábadu “La compañía de Xuan Saco Botardo echa la comedia El críu de los amos”

L’Área de Cultura del Conceyu de Villaviciosa, col sofitu de la Conseyería de Cultura y Turismu d’Asturies y el Circuitu de les Artes Escéniques, estrena la obra teatral “La compañía de Xuan Saco Botardo echa la comedia El críu de los amos”, que va poner n’escena’l grupu “Nun tris”. L’actuación va celebrase’l sábadu a les ocho la tarde, nel Teatru Riera de Villaviciosa.

Esta pieza, traducida al asturianu por Lluis Portal, básase na obra escrita en 1745 por Carlo Goldoni “Il Servitore di due padroni”. El dramaturgu venecianu considérase ún de los padres de la comedia italiana, na que predominaba naquel tiempu la Comedia dell’Arte: personaxes populares, acción enredada, mazcares…

L’humor deriváu de les situaciones cómiques que se desarrollen na obra de Goldoni, l’adaptación de los personaxes y la peculiar forma dialectalizada de falar d’éstos, aseguren una prestosa velada con una de les meyores compañíes profesionales de teatru d’Asturies, Nun Tris.