Yá ta nes lliberíes “Pa echar unes rises”, la primer antoloxía de monólogu modernu n’asturianu

25 xunu 08:53 2008 Imprimir

Va dellos díes que pue atopase nes lliberíes l’últimu llibru de la editorial Trabe dientro de la colección “Mastros del homor”, l’antoloxía de monólogu modernu “Pa echar unes rises” onde Inaciu Galán antologa dellos monólogos propios y otros escritos por Cristina Muñiz Martín, Azucena Álvarez García, Isaac G. de L’Arada, Benxa Pérez y Chechu García. Un llibru que ye’l frutu del trabayu fechu por actores y autores nos últimos años pa la modernización del monólogu asturianu.

Nel entamu del antologador, Galán comenta como “dende va unos años delles persones venimos trabayando na modernización d’un xéneru lliterariu y escénicu que s’espresó siempres n’Asturies na nuesa llingua con más que notable ésitu y que nes últimes décades taba perdiendo públicu ensin parar”. Pal coordinador del llibru, esta perda venía, per un llau, «pola desconexión temática y estética del monólogu tradicional asturianu col públicu más mozu y urbanu» y, per otru, «pola sustitución del xéneru tradicional asturianu por otru tipu d’humor: el monólogu “stand-up comedy”, ye dicir, les formes y temes del monólogu modernu y televisivu fechu nos Estaos Xuníos y, amás, en castellanu».

Nel llibru pueden atopase los monólogos “Asturianos al volante”, “Les vueltes que da la vida” y “Los asturianos dende fuera”, escritos por Inaciu Galán y González & Isaac G. de l’Arada; “L’home y la gochería”, “La hestoria, más o menos” y “Qué guapu ye l’amor” de Benxa Pérez; “Cuatro verdaes” y “Otres cuatro verdaes” de Chechu García; “El soplómetru”, “El prexubiláu”, “Dientro la llegalidᔠy “Mensaxes curtios” de Cristina Muñiz Martín y “Tópicos asturianos” d’Azucena Álvarez García.

La presentación del llibru va facese na seronda coincidiendo cola celebración del IV Certame de Monólogu Modernu, entamáu por Xareos! Xestión Cultural.

  Categories:
Loading Facebook Comments ...