Xuristes pol Asturianu denuncia la retirada de la bandera de la UE de la Universidá d’Uviéu

Nun comunicáu dechu públicu esti domingu, l’Aconceyamientu de Xuristes pol Asturianu denuncia la retirada de la bandera de la Comunidá Europea de la sede de la Universidá d’Uviéu “por mandáu del Xefe de Protocolu de la Casa real, fechu perabegosu pa los ciudadanos que mos sentimos, arriendes d’asturianos y asturianistes, fondamente europeos y europeístes”.

Sigún el comunicáu del Aconceyamientu de Xuristes pol Asturianu “per escritu de 10 de setiembre del qu’aportaron hai tiempu acuse recibu, l’Aconceyamientu alvertía al Xefe de la Casa Real d’un claru riesgu: que la presencia del Xefe l’Estáu na inauguración del cursu académicu fuere políticamente emplagada como aval de la Corona a un modelu aducativu, l’impuestu n’Asturies, qu’incumple dafechu l’articulu 8 de la Carta Europea de les Llingües Rexonales o Minoritaries no que cinca al respetu debíu a la llingua tradicional del país”. L’asociación esclaria que “rempuesta entá nun hebio, quitando que lo seya la retirada, por mandáu del Xefe de Protocolu de la Casa real, de la bandera de la Comunidá Europea de la sede de la Universidá d’Uviéu”.

Na carta mentada unviada a la Casa Real faise alcordanza de que “yá dende l’añu 1975 nel que l’Estáu español entamó a camudar d’actitú respeutu a les llingües rexonales estremaes del castellán, l’asturiana vien careciendo, na nuesa opinión, un tratu discriminatoriu per parte de los poderes públicos, en toles estayes y ensin xustificación dala. Asina, nel inxerimientu dientro del sistema educativu –quiciás el preséu más afayadizu pal caltenimientu d’una llingua- l’asturianu nun recibió del Estáu la proteición que-yos dio al catalán, gallegu, valencianu y vascu.” Pal Aconceyamientu, “a ello nun foron ayenos los executivos preautonómicos y autonómicos del Principáu d’Asturies porque -amás de que dalgunos de los sos cabezaleros ocuparon enantes importantes cargos na Alministración Educativa- dende’l gobiernu rexonal ná nun se fizo por meyorar lo que recibieron de l’Alministración Central tres les tresferencies educatives nel añu 2000 sinón que, al aviesu, avecen a enchipase públicamente pela parte que-yos tocó nel diseñu y xestión d’un modelu educativu estremáu del que rixe nes demás comunidaes autónomes billingües y qu’incumple tolos separtaos del artículu 8 de la Carta Europea de les Llingües Rexonales o Minoritaries, conveniu ratificáu por España, arriendes de les recomendaciones básiques d’instituciones tan peracreditaes como la UNICEF o la UNESCO”.

Poro, nun ye pa escartar, sigún l’asociación, “que l’aceptación del convide que se-y fizo al Xefe del Estáu pa presidir la inauguración del añu escolar 2007-2008 na Comunidá del Principáu d’Asturies, pudiere interpretase o emplegase como un aval a un modelu eductivu esceicional n’España, contrariu al testu y finalidá de los trataos y recomendaciones internacionales na materia ya impuestu por determinaes personalidaes polítiques estatales y rexonales”. La carta nun escaez que “n’opinión de tolos espertos, la llingua asturiana ta esmuciéndosemos porque se-y ñeguen les más de les midíes de proteición que se-yos da a les demás llingües rexonales españoles en toles estayes de la vida pública, na educativa na que más, al estremu de qu’anuncien el so fin nun par de xeneraciones. Por estes razones y col envís d’ayudar a torgar qu’una actuación bonal del Xefe del Estáu pueda tener como consecuencia daqué menoscabu futura del prestixu de la Corona qu’encarna, ye polo que dende l’Aconceyamientu de Xuristes pol Asturianu decidímonos a unvia-y esti escritu y estudiu que lu acompaña”. La carta fírmala Xurde Blanco, como Secretariu del Aconceyamientu de Xuristes pol Asturianu.