Xune Elipe destacó la bona salú de la música asturiana na presentación de “Salú ya Dixebra”

Xune Elipe, como director del sellu L’Aguañaz, presentó esti vienres 8 de febreru, “Salú ta Dixebra. Perversiones”, el discu nel que 21 bandes asturianes versioneen el repertoriu de la so banda coincidiendo colos 21 años de vida de Dixebra na escena musical asturiana. Nel actu, que se cellebró nos locales que la SGAE tien n’Uvieu, tamien tuvieron presentes dellos de los músicos que participaron nestio trabayu como Maxi de Fe de Ratas, Pablo Viña y Míguel Fernandi, cantante de Skama la Rede.

El cantante de Dixebra y responsable d L’Aguañaz quiso destacar el fechu de grupos que normalmente nun canten n’asturianu lo faigan nesti discu. “La llingua asturiana te convirtiendose nun elementu perfectamente válidu pa facer cualquier tipu de música. Xune Elipe quiso destacar tamien el nivel de calidá que hai nesti momentu na escena musical asturiana. “Creo que hai unes bandes mui buenes nesti momentu en tolos estilos y creo que too ello rescample nel discu, queda bien a les clares”. Asimesmo’l vocalista de Dixebra destacó la so propia satisfacción y la del restu de la banda col resultáu de les versiones.

Nel discu rescampla una gran variedá d’estilos y, como señaló’l propiu Elipe, la bona salú musical d’Asturies. Prueba d’ello son les versiones de bandes rock como Fe de Ratas, Desakato, Pablo Viá, Mala Reputación, Desorden; punk como Skontra, Aprieta’l kulo o Sambre; ska (Skama la Rede); harcore (Escuela de Odio); reggae, como La Tarrancha y Chalaneru Sound System; hip-hop, cola presencia d’Arma X, Dark La eMe y K-Nalón; ellectrónica (Dani Stylo), o folk (La Bandina, Los Chiquitrinos, Dulcamara, Skanday La col.lá Propinde).