Xune Elipe: “Preparo un programa musical pa la TPA”

22 marzu 11:38 2013 Imprimir

Ye conocíu como músicu, pol so llabor al frente de Dixebra, pero diz que nunca nun se definió como talu. Prefier llamase “activista musical” y como talu lleva 25 años col so grupu y con otres iniciatives como la so discografíca, va un añu convertida en productora audiovisual Goxe. De los proyectos d’esta aventura empresarial y de la so actividá cultural, falamos con Xune Elipe, estrenando asina un nueva etapa de la Entrevista de la selmana n’Asturnews.

-Dempués d’un añu d’actividá de Goxe Producciones, ¿qué balance fai?

- Tamos, como quien diz, asitiándonos tovía; definiendo’l nuestru proyectu nun momentu tan gafu como ésti onde hai que conocer bien l’escenariu nel que te vas mover, diversificase y ser competitivos, col aquel añadíu amás de ser una empresa «militante». De toes maneres nesti tiempu espublicemos trés referencies discográfiques nueves (Toli Morilla, Mariluz Cristóbal Caunedo y Soncai System), recuperemos la cabecera del Anuariu de la Música Asturiana y saquemos el volume correspondiente al añu 2012 o producimos la Gala del Premiu al Meyor Cantar, ente otres coses. Y yá tenemos en mente poder llevar alantre otros proyectos nuevos.

-¿En qué campos tán trabayando más?

- Agora tamos mui enfotaos nel ámbitu de la producción audiovisual, proponiendo proyectos interesantes y buscando financiación o patrociniu pa ellos. Abúltanos qu’hai que dar esi saltu, más agora cuando paez que la visibilidá del movimientu en defensa de la llingua asturiana ta en tiempos baxos, yá nun basta con tar na cai, hai que tener presencia mediática si queremos qu’esto tenga futuru.

-Dientro del campu audiovisual ¿ta mirándose n’Asturies pal ámbitu de la música?

- La verdá que non. Los medios de comunicación afincaos n’Asturies, mesmamente los públicos, tienen un tratamientu del fechu musical asturianu mui curtiu y esporádicu, cuando lo que se necesita ye una atención global y continuada nel tiempu. De nada val qu’un día suene un grupu del país, de manera anecdótica, na radio por exemplu, cuando depués bombardien a la mocedá a toles hores col últimu éxitu comercial.

-¿Cómo podría promocionase a los artistes asturianos dende los medios, nun tán daqué faltos d’escaparates?

- Equí nun hai secretos nin fórmules máxiques, cenciellamente dedicándo-yos tiempu y espaciu. La xente nun aprecia lo que nun conoz, por eso hai que facilita-yos esa conocencia. A los medios privaos hai qu’afalalos y acoseya-yos que programen música fecha nel país; otra cosa son los públicos, a los qu’hai qu’esixi-yos que lo faigan porque pa eso tán, sinón nun s’entienden.

-Apocayá recoyóse nun llibru los primeros 25 años del so grupu, Dixebra, ¿qué tal la esperiencia de ver recoyida nuna obra la so propia vida, polo menos artística?

-Foi daqué prestoso. Nun primer momentu, cuando Paco (Francisco Álvarez, responsable d’Ediciones Seronda y autor del llibru) nos comentó la idea nun lo vimos mui claro, pero al final, al ver toles lletres axuntaes y contestualizaes paeznos que quedó mui guapu. Ves el trabayu que desendolquemos toos estos años, cómo fuimos evolucionando nes nuestres lletres y la rellación que llogremos cola lliteratura en llingua asturiana al traviés de los escritores que collaboraron con nós. Otra manera, eses lletres son una especie de documentu de la realidá asturiana d’esti últimu cuartu de sieglu, practicamente nun hai tema o sucedíu importante que pasare nestos años n’Asturies que nun tenga’l so reflexu nún de los nuestros cantares.

-Dempués de celebrar esti aniversariu de Dixebra ¿agora toca descansar o ponese con discu nuevu?

- Yá tamos trabayando nel próximu discu, tenemos más o menos la metá de les canciones montaes y arreglaes (tanto en música como en lletra) y tamos preparando les maquetes de les que falten. Queremos tenelo acabáu pal final de la primavera, curtilu en directo nes actuaciones, onde vamos dir inxertando temes nuevos, grabalu pa la seronda y espublizalu pa la temporada de seronda-iviernu.

-Esti añu llevaron los sos cantares a Lleón, per primer vegada ¿qué tal acoyida tuvieron en tierres lleoneses?

- Bien bona. Tuviemos un tiempu permalu, mesmamente ñevó aquella tarde-nueche, y nun foi tol públicu qu’esperábemos, pero ainda asina tuvo bien. La xente diolo too y cantó y bailló como’l públicu de casa.

-¿Y recibir el Premiu Andrés Solar, una esperiencia guapa?

- Muncho, sobre too porque, como comentemos al recoyelu, dábennoslu los nuestros iguales, los y les militantes de la reivindicación llingüística. Yo particularmente nunca me presenté, nin m’axetivé, como músicu, cantante o artista, siempre me consideré un activista musical, si quiés un comunicador; por eso prestó que los que lleven día a día la llucha pol nuestru idioma te reconozan y faigan alcordanza del to llabor.

-Acaba de collaborar tamién col grupu Habeas Corpus, ¿qué tal la esperiencia?

- Bien guapa. Yá tuviera ocasión de collaborar con otres bandes del Estáu, como los gallegos Os Diplomáticos o Heredeiros da Cruz, los madrilanos Boikot o los aragoneses Prau, y facelo agora con Habeas Corpus, nel aniversariu del so venti aniversariu, foi un honor, amás al llau de xente mui importante nel terrén del rock comprometíu y militante a nivel estatal. Colos «habeas» coincidimos en munchos festivales y conciertos y siempre tuviemos una rellación d’amistá y compañerismu.

-¿Qué otros proyectos tien Xune Elipe en mente?

- Como yá comenté, acabar de preparar el discu nuevu de Dixebra, y tamién afitar Goxe Proucciones, participar na Axenda Didáctica con un proyectu llamáu Rock nes aules, perfilar dellos proyectos radiofónicos y ultimar los preparativos pa escomenzar a emitir un programa musical pa la TPA.

  Categories:
Loading Facebook Comments ...