Xulguen a una independentista por querer facer una entruga a Rosa Díez

Va dellos meses la llider de la formación centralista española UPyD daba una conferencia nel Clú de Prensa Asturiana, de La Nueva España. Nesti actu, una militante independentista llevantó la mano col envís de facer una entruga a Díez y foi detenida enantes de poder facela, según afirmen dende’l colectivu Sofitu.

Esti vienres habrá un xuiciu de faltes por “coaiciones” nos xulgaos d’Uviéu y dende Sofitu convócase una concentración a les 11:30 la mañana nos xulgaos d’Uviéu pa “solidarizase cola militante asturiana y denunciar a los nuevos faches que s’escuenden tres el nomáu estáu de drechu costitucionalista”.

Sofitu afirma que “Nesa charra, los únicos fechos qu’asocedieron, foi que la muyer agora xulgada foi sacada pola fuercia de la sala y entregada a los miembros de la policía española namás que por llevantar la mano pa facer una entruga que nun pudo nin entamar. Una vegada fuera la sala foi detenía y conducía a comisaría”.

Pa Sofitu “La denuncia de los ultres españoles, ye un montaxe políticu-policial que tien como fin volver a pasar de verdugos a victimes, y criminalizar, de pasu, a tolo que nun seya españolismu ranciu” denuncia la organización antirrepresiva. Asina, “nel so escritu mienten cuando dicen qu’unes venti persones taben insultándolos nel esterior pos la muyer foi sola al actu. Mienten cuando dicen que diba enfilada o drogada porque diba en perfeutu estáu. Mienten cuando dicen que los insultó y amenazó, porque nun la dexaron nin abrir la boca”.

A la fin, espliquen, “de too esto foron testigos los periodistes de los medios afines que cubrieron l’actu, y que nun asoleyaron nada de los supuestu incidente nes sos cróniques, porque namás que nun asocedió”.