Xuan Santori presenta la emoción y la ironía como vacunes contra la muerte nel so últimu llibru de poesía

Xuan Santori, un de los poetes más interesantes de les últimes promociones lliteraries en llingua asturiana, insiste nel so últimu llibru de poemes en persiguir al través d’una voz cada vez más segura el desciframientu de les claves fundamentales de la vida de cualquier ser humanu, “andar per esos caminos pelos qu’andaron munchos de los poetes qu’admiro y de los que me gustaría deprender lo bastante como pa nun paeceme demasiao a ellos nin imitalos, algamar una voz propia”, afirma l’autor énte la publicación de ‘Bis a bis’.

Santori afirma que nesti nuevu volume de poesía trata de “usar ferramientes familiares pa enfocar una busca personal capaz d’enfrentase al sentimientu amorosu, alrodiu del que xiren estos poemes”, delles d’estes ferramientes seríen pal autor de ‘Bis a bis'(Trabe, 2004) “la ironía, ciertu distanciamientu énte la realidá y la consecución ideal de la emoción como oxetivu, una emoción de la que participe’l llector”. La complicidá del llector ye un elementu esencial pa Xuan Santori a la hora de “da-y sentíu a la poesía, ensin ello nun tendría nengún, namás si él se ve reflexáu o se siente cómpliz de lo qu’ún espresa puede llegar al so destín final la poesía”, afirma.

Xuan Santori afronta la publicación del so nuevu volume de poemes con “cierta madurez vital y tamién cierta inestabilidá, porque pienso que cada día tamos espuestos a una realidá estelante y ablucante”, énte esa realidá “defendémonos cola atración del amor que nos vacuna tamién contra la muerte, otru de los elementos presentes nel llibru”.

‘Bis a bis’ de Xuan Santori preséntase esti xueves 17 a les 20,00 nel chigre El Naranco d’Uviéu nun actu nel que va compartir protagonismu cola tamién poeta Ana Vanessa Gutiérrez y el so llibru ‘La danza la yedra’. Va ser una presentación mano a mano na que cadún de los autores va falar del llibru del otru, una cita interesante pa cualquier llector atentu de les novedaes lliteraries en llingua asturiana.