Xuan Bello: “Ye’l momentu de reflexonar y centrame nel balance”

Xuan Bello (Paniceiros, Tinéu, 1965) torna a la radio, dempués d’una curtia esperiencia nos años ochenta, con un programa na RPA, “Clave de fondo”, nel que busca “un ritmu más serenu dempués del fútbol” y aprovechamos la escusa pa falar con él d’estes y otres cuestiones. La presencia del asturianu nos medios, los sos proyectos de futuru… Bello afirma nesta “Entrevista de la selmana” que “la verdá interior pue entrevese en toles sos contradicciones”, y ye esa verdá interior lo que busca algamar coles sos entrevistes.

-Dempués de munchos años otra vuelta na radio, ¿echaba de menos el mediu?

-La radio, la verdá, nun foi una señaldá que cultivara más qu’a les veces. Ye verdá qu’hacia 1983 o 1984 participé nun programa de radio, en Radio Asturias, que se llamaba “Nortiando” y onde coincidí con una banda de cómplices onde taben, recuerdo agora, persones mui dispares. Ye un momentu auroral na mio conciencia, que tengo cuasimente escaecíu, yo facía deciséis años, pero que sé que foi mui prestoso. Asina qu’echar, lo que se diz echar, nun lo echaba esactamente de menos. Realcontrase cola radio con too y con eso ye muy prestoso. Cándido, el gran maestru del periodismu español, con quien coincidí una tarde na mio adolescencia nun programa de RNE, dixome qu’escribir yera cavar y falar dalgo más folgao. Home, nun ye esacto, pero…

-Na presentación del programa faló de que la idea yera “dignificar el formatu de la entrevista”, ¿cómo se plantega consiguilo?

-Nun creo que dixera que la idea yera “dignificar”, lo que diba suponer de la mio parte que pensaba qu’hai dalgún tipu d’indignidá nesi xéneru. Tengo munchos compañeros que faen entrevistes d’una manera más que digna y yo parto d’esi camín fechu. Más bien creo que falé del oxetivu d’afondar, d’intentar dir más allá en conversaciones que nun tengan que tar necesariamente pendientes de l’Actualidá (una señora que propón cuando babayaes cuando maraviyes). A min, como periodista, interésame muncho promover dalgo que deprendí na lliteratura. ¿Pue descubrise la verdá interior de les coses, trespasar les llindes de la verdá aparente? Bono, eso intentamos. La “verdá interior” pue entrevese en toles sos contradicciones y, precisamente por eso, la entrevista pue que seya un mediu adecuáu pa llegar a ello.

-¿Qué tal acoyida tuvieron les primeres emisiones?

-Polo que sé bona-bona. Tengo qu’agradece-y a la dirección de RPA tanto la promoción del programa como l’horariu qu’escoyeron pa emitilu. Échenlu los domingos, a les 21:30, inmediatamente dempués de la programación de fútbol y vuelven ponelu al sábadu siguiente pela mañana, xusto enantes del magazine de Sonia Avellaneda, otru programa más que consolidáu. Ye un retu más qu’interesante: nel primer casu por númberu d’oyentes, pola circunstancia de tener que cambiar un ritmu trepidante por otru más serenu; nel segundu por anteceder a un programa qu’almiro na so calidá y profesionalidá y que, por cierto, tamién cultiva la dignidá de la entrevista. Una radio pública pue apostar por formatos como ‘Clave de fondo’ que, aparentemente, nun son comerciales; pero a la xente suel gusta-y lo bien fecho y nós tamos comprometíos en facer bien les coses.

-¿Ta prevista una segunda temporada de “Clave de fondo?

-Asturies, afortunadamente, ta enllena de munchos personaxes que dan pa cincuenta temporaes de Clave de Fondo. Diba ser maraviyoso poder facelo.

-¿Qué-y paez la presencia que tien l’asturianu na RPA?

-Oxetivamente creciente. Programes como’l d’Antón García o’l de Vanessa Gutiérrez son mui interesantes y hai dalgunos, como’l d’Ismael González Arias de la tonada, que tienen miles d’oyentes. Ye dalgo mui esperanzador.

-¿Qué programes sedría más urxente emitir n’asturianu?

-Les llingües valen fundamentalmente pa entendese y una ufierta n’asturianu de programes interesantes y bien fechos podía (en realidá, ta pudiendo) dar pasu hacia la cordialidá del entendimientu. Nun creo que seya una cuestión de cantidá a priori, sinón de calidá que va ganando a cada cachu espacios más grandes. Lo peor que-y diba soceder al procesu de normalización de la llingua asturiana, un procesu complexu y difícil, ye que se fixara una cuota determinada ya inamovible. Esto ye una opinión mía y la verdá nun sé que profundidá tien. Yo aspiro a too, pero soi paciente. D’una cosa toi seguru: nun creo na fatalidá. Si les coses se faen bien dientro de venti años podremos felicitanos del llabor fecho, que bien paez.

-Dende nun va muncho yá nun trabaya nel mediu nel que lo fizo cuasi quince años, Les Noticies, ¿echa de menos el trabayu na redacción?

-Efectivamente trabayé dende’l primer númberu en Les Noticies, un proyectu vertebrador y necesariu qu’ayudé, no que fui quien, a consolidar. Munches de les coses que construyimos en Les Noticies llévoles comigo porque, simplemente, nun se puede abandonar lo qu’ún ye (y nun falto a la verdá si-y digo que toi contentu por dexar dalgo de lo que soi no que fui ellí). Foi una etapa, una llarga etapa na que se ficieron munches coses. Aparte d’eso, el trabayu de redacción, como usté diz, sigue ehí: trabayo nesti momentu pa El Comercio y l’ABC en palleres que, llaboralmente, me satisfaen por completo.

-Nel campu lliterariu, ¿qué novedaes vamos conocer de Xuan Bello en 2011?

-¿Nel 2011? Los proyectos lliterarios tienen víes fondes que son difíciles d’esplicar y ún piensa nel 2015 como espaciu de resolución de contradicciones. Vengo d’una llarga temporada na que publiqué de manera mui intensa y, soi del paecer, ye’l momentu de reflexonar y centrame nel balance. Varios llibros mios tán traduciéndose y sigo con espectación esi procesu. Otra manera, tengo preparáu un llibru, “Escrito nel xardín”, onde punxi muncho de lo que yo yera: la mio preocupación pola poesía, la palabra dicha en sentíu d’harmonía como forma de construyir, pal llector, espacios d’intensidá. El ser humanu ye un ser que suaña y realiza: yo, humildemente, aspiro a alimentar esi ser.

-¿Y el tan esperáu poemariu nuevu?

-¿Usté cree que ye tan esperáu? Bono, sigo escribiendo. Y de momentu publicando poesía en prosa –-nesta entrevista propongo-y un endecasílabu que seique nun diba despreciar Guido Cavalcanti– siempre que tengo oportunidá.

-¿Qué más proyectos tien en marcha agora?

-Munchos y toos con un enclín diferente, anque toos converxen nun mesmu sitiu; la edá confier templanza al alma inquieta y apriéndete a nun falar de lo que vas facer, sinón de lo que ficisti. Va unos meses, con unos cuantos socios, fundamos una empresa, “Un mar de dudes”, y dende hai trés meses trabayamos d’una manera mui intensa en trés o cuatro proyectos mui novedosos qu’espero lleguen a bon tálamu.

Páxina del programa coles entrevistes