XSP recuerda’l mandáu de cumplir el Plan de Normalización en tolos eventos de Xixón

XSP recuerda’l mandáu de cumplir el Plan de Normalización en tolos eventos de Xixón
04 xunetu 14:27 2017 Imprimir

Xixón Sí Puede vieno acabante presentar un ruegu al Conseyu d’Alministración de Divertia pa que se cumpla pa col mandáu del Plan de Normalización en tolos eventos qu’entame’l Conceyu y qu’asina  l’asturianu tea presente nes actividaes impulsaes pol Ayuntamientu, les Fundaciones municipales y Divertia.
El grupu municipal de Xixón Sí Puede (XsP) lleva esti día un ruegu a la Comisión de Bienestar Social, Cooperación, Cultura y Educación y al Conseyu d’Alministración de Divertia reclamando que l’asturianu tea presente en tolos eventos qu’entame’l Conceyu. Una reivindicación que se recueye nel Plan de Normalización Llingüística de Xixón 2016-2019 aprobáu nel Plenu de marzu de 2016 col sofitu de tolos grupos políticos, sacante’l PP que s’abstuvo.

Nesti documentu indícase que se va “impulsar l’usu del asturianu nos ámbitos empresariales, sindicales, culturales, artísticos y demás propios de la sociedá xixonesa”. El Plan tamién diz que se va a procurar usar l’asturianu “na publicidá, información y publicaciones d’eventos relevantes de Xixón programaos a lo llargo l’añu que tengan de ver cola proyección esterior del Conceyu p’asina fomentar la imaxe cultural del propiu Conceyu y venceyala col asturianu; yá seyan los entamaos pol Conceyu de Xixón o nos qu’ésti participe de manera preminente”. El plazu que se daba pa principiar a trabayar nesta llinia yera dende’l segundu trimestre de 2016, plazu enforma agotáu.

Por esti motivu, XsP recuerda al Ayuntamientu la necesidá de que l’asturianu tea presente en tolos eventos que faiga l’Ayuntamientu, les Fundaciones municipales y Divertia. Nesti sentíu, la llingua asturiana habría tener presencia en cartelería, lones y escenarios, tanto no que cinca a la toponimia, como a la información y promoción de les actividaes. En concreto, el grupu municipal entiende que ye imprescindible que l’asturianu sía visible n’eventos como l’Arcu Atlánticu, los conciertos del branu, el Festival Internacional de Gaites, el Festival Folclóricu, la Selmana Grande, el Festival de la Sidra, el Festival de Cine y los eventos gastronómicos nos que participe Divertia.

  Categories:
Loading Facebook Comments ...