XSP celebra que l’Alcaldía rectifique y nun censure nel Festival Arcu Atlánticu

XSP celebra que l’Alcaldía rectifique y nun censure nel Festival Arcu Atlánticu
26 xunetu 13:29 2017 Imprimir

Xixón Sí Puede (XsP) vieno acabante celebrar, como tamién acaben facer delles asociaciones, que l’Alcaldía rectifique y se llevante’l vetu inxustificáu por parte de la Conceyalía de Cultura y Educación a l’actividá propuesta pola Xunta pola Defensa de la Llingua Asturiana (XDLA) nel marcu del Festival Arcu Atlánticu. 

Nel so momentu, Cultura refugó’l Proyectu 2018 pola Oficialidá  de la XDLA pa la reforma del Estatutu d’Autonomía  por tener “una visión del fechu llingüísticu mui venceyada a la política” pero a la fin, l’Alcaldía reconoció’l sinsentíu d’esti vetu y comprometióse a facilitar a la XDLA la realización d’esti actu de la XDLA en Xixón, que por cuestión de plazos va a facese en setiembre.

La rectificación vieno depués de la denuncia del propiu colectivu, al que se-y afaló a “da-y una vuelta” a la so propuesta, y de Xixón Sí Puede que se desmarcó d’esta edición del Festival y siguientes en casu de non dar marcha atrás a una decisión que recordaba a actitúes propies d’otru tiempu. “La XDLA presentó una propuesta totalmente compatible cola temática del Festival, les llingües minorizaes, polo que pretender marcar dende la Conceyalía de Cultura lo qu’esta organización pue dicir o nun dicir ta dafechu fuera de sitiu y más cuando se fala de ‘politización’ d’un asuntu que ta en sí politizáu pol estatus de les propies llingües minorizaes. Nestos díes nel Festival vamos sintir estremaos discursos sobre la situación de bien de llingües minorizaes n’Europa, polo que nun s’entiende que se quiera negar abordar esta cuestión n’Asturies”, declaraba güei nuna nota de prensa Mario Suárez del Fueyo, portavoz de XsP.

La Fundación Municipal de Cultural, responsable cabera del festival Arcua Atlánticu de Xixón, treslladó-y nel so momentu a la Xunta pola defensa de la Llingua (XDLA) qu’una charla pa presentar el Proyectu 2018 nun encaxaba nun festival que nesta edición pretende poner en valir les llingües minoritaries europees por considerala “una visión del fechu llingüísticu mui venceyada a la política”. Darréu d’ello, la XDLA acusaba hai díes a los organizadores, nuna nota de prensa, de querer tapecer la realidá na que vive la llingua asturiana y crítica que se tenga’l valor de pidir a una asociación que modifique’l conteníu d’una presentación.

La situación entamaba cuando’l Conceyu de Xixón abre una convocatoria p’asociaciones culturales pa la realización d’actividaes dientro del Festival Arcu Atlánticu 2017. La Xunta pola Defensa de la Llingua Asturiana (XDLA) solicitó esti espaciu pa presentar nuna charla’l Proyectu 2018, una iniciativa pa poner en marcha una reforma estatutaria al traviés del Artículu 56.1., y pa colocar un puestu con material nel que tamién s’esplicara’l trabayu de la organización. Sicasí, la Fundación Municipal de Cultura, Educación y Universidá Popular de Xixón denegó’l permisu pa la primer actividá por considerar que “nun encaxa bien cola filosofía del Arcu Atlánticu; ye una visión del fechu llingüísticu mui venceyada a la política que desdibuxa la idea del Festival na que venimos trabayando dende la primer edición”.

  Categories:
Loading Facebook Comments ...