Xovellanos va protagonizar les celebraciones del Día Internacional del Llibru n’Avilés

Xovellanos va protagonizar les celebraciones del Día Internacional del Llibru n’Avilés
16 abril 15:50 2019 Imprimir

Los centros culturales d’Avilés tornen con actividaes los díes previu y posterior al 23 d’abril con un programa nel que va ser protagonista de la celebración del Día Internacional del Llibru Xovellanos.

Un añu más, el Día Internacional del Llibru va ser protagonista n’Avilés. La conceyalía de Cultura, al traviés de los distintos centros culturales municipales, preparó un completu programa que toma los díes previu y posterior al 23 d’abril, día de la conmemoración. La principal atención va ser pa les neñes y los neños, con distintes actividaes destinaes a l’animación a la llectura.

Una ruta va siguir los pasos del pernomáu pensador asturianu poles cais de la ciudá, que recoyó nos sos Diarios, y a la ruta van xuníse cuentacuentos n’español ya inglés, bebecuentos y talleres d’animación a la llectura, ente les distintes propuestes. El Centru Social de Llaranes sumaráse amás con talleres diversos y un mercadín solidariu de llibros.

La principal novedá d’anguaño va ser esa ruta lliteraria centrada na figura del pensador asturianu Gaspar Melchor de Xovellanos. Lleva por títulu “Tres los pasos de Xovellanos n’Avilés”, y va tener llugar el mesmu martes 23 d’abril. Con salida na Plaza d’España a les 17 hores, va llevar a quien s’inscriban al traviés de les cais de la ciudá, a conocer los monumentos que Xovellanos describió nos sos Diarios.

Coles mesmes, los y les más pequenes de la casa, d’ente 4 y 9 años, van poder esfrutar de cuentacuentos, al cargu de la compañía Tragaluz Títeres, que va proponer el so espectáculu “Cuentos de Aquiyalla”, na Biblioteca Bárganos Candamo (23 d’abril), Biblioteca de La Lluz (24 d’abril), Biblioteca de La Carriona (25 d’abril), y Centru Sociocultural de Los Canapés (26 d’abril).

Amás, vienen realizándose talleres de Talleres d’Animación a la llectura, pa neñes y neños d’ente 4 y 8 años, al cargu de La Caracola. Yá se pudieron esfrutar en Los Canapés y Bárganos yen La Lluz y La Carriona. Agora, más palantre, el 27 d’abril, entamase pa los pequeños y les pequeñes, d’ente 3 y 9 años, un cuentacuentos n’inglés, al cargu de Kids & Us Language School, na Biblioteca Bárganos Candamo.

Tamién caltién la so habitual actividá’l Club de Llectura de la Biblioteca Bárganos Candamo, que va tener la so xunta mensual pa comentar el llibru “Cantar duce”; de Leila Slimani, el 30 d’abril en La Noria del parque de La Ferrera. Van Asistir unos díes antes, el 27 d’abril, al IX Alcuentru de Clubes de Llectura d’Asturies, nel restorán La Torre, en Llanera, col escritor Javier Abarganes como convidáu.

Y de nuevu Llaranes va concentrar un gran númberu d’actividaes alredor del Día Internacional del Llibru, al traviés del so Centru Social. La selmana del 22 al 28 va cuntar con distintes actividaes pa tolos públicos y protagonismu pa la infancia, dende un taller d’espresión artísticu lliteraria, xuna “Cita a palpu con un llibru”, talleres de cuentacuentos y música, según un mercadín solidariu del llibru.

El Centru Municipal de Persones Mayores sumase a les celebraciones, con una sesión del proxecto “Llectura y Escritura Creativo”, nel que se desenvuelve’l gustu de la llectura y l’escritura al traviés de distintes técniques, dinámiques, alderiques… Va Tener llugar el xueves 25 d’abril, a les 17 hores, col epígrafe “Érase una vegada un cuadru”, pal que ye necesariu inscripción.

Ver más información

  Categories: