Xosé Alba fala en Xixón del costu de los recursos naturales

Esti martes, 15 de payares, a les 20 hores, nel llocal social del Atenéu Obreru de Xixón, Ástura organiza una conferencia sobre De la contaminación d’Avilés al desaniciu les abeyes: el costu de los recursos naturales, a cargu de Xosé Alba Alonso.

“Usar el mediuambiente nun ye gratis. Tamos esmolecíos pola contaminación d’Avilés, pol fueu que lleva los montes per delantre, pol despoblamientu del campu, pol argayón y l’augua que nun somos quien a controlar nel tunelón del AVE o pola solución que-y vamos dar a la basoria que producimos. Per otru llau, nun mos podemos escaecer de problemes globales como’l cambéu climáticu o la estinción de les abeyes, cuando non les migraciones climátiques. Per munchos años nun se ficieren cuentes del costu que tinía l’usu de los recursos naturales. Pero cuantayá que se fala d’esternalidaes, de pone-y una llende bien nidia al marafundiu de partes de la naturaleza que nun son gratis”. Con esta reflexón entama la propuesta que fadrá Xosé Alba esti día d’un problema que tien perbien definíu David Pearce dende 1989 nel so Blueprint for a Green Economy.

Nesta conferencia va razonase cómo ye perimportante da-yos un valor a los recursos qu’usamos del común, nesti casu de la naturaleza, y saber usalos con tientu. Pa ello, pondremos enriba la mesa exemplos nidios del usu que-y damos a los recursos naturales, mesmo en positivo qu’en negativo, col envís de contribuyir, como consumidores, profesionales y ciudadanos, a la conservación de les condiciones que mos faen posible’l bienestar qu’algamamos.

Xosé Alba Alonso ye Doctor en Ciencies Económiques y Empresariales pola Universidá Autónoma de Madrid y Profesor Titular d’Economía Aplicada del Departamentu de Economía Aplicada de la Universidá d’Uviéu. Participó en estremaes actividaes de Fundaciones, Comunidaes Autónomes, Ayuntamientos, Colexos profesionales de Biólogos, Inxenieros, etc. Tien especial enfotu nos campos d’Economía de los recursos naturales y desendolcu asociáu a los espacios naturales protexíos. Trabayó en proyeutos sobre turismu, usos del suelu y caltenibilidá, enerxía y aplicaciones teunolóxiques con implicaciones económicu-ambientales. Miembru de los Comités d’Espertos en Cambéu Climáticu y de Desenvolvimientu Rural del Principáu, compareció repetíes vegaes nel parlamentu asturianu pa informar sobre temes venceyaos al desendolcu caltenible. Participa nel Observatoriu Llatinoamericanu de Desenvolvimientu Caltenible y Ordenación del Territoriu, a traviés de la Universidá Autónoma de Madrid. Espublizó numberosos trabayos y estudios sobre l’entornu socioeconómicu, el desendolcu rural o l’impautu del turismu nos Parques naturales, con particular procuru nel parque de Somiedu y nel paque nacional de los Picos d’Europa. Los espacios protexíos, la caltenibilidá nos usos del suelu y el cambéu climáticu, les sos evidencies n’Asturies y los sos efeutos potenciales, foron tamién oxetu de les sos investigaciones. Tamién asoleyó trabayos sobre rellaciones internacionales, viesques, dellos conceyos asturianos, educación, etcétera… y llibros iguaos pa la docencia universitaria de la Estructura Económica. Angüañu ta organizando, xunto con profesores de la Universidá, un grupu d’investigación sobre desenvolvimientu rural. Ye miembru de varies asociaciones, ente elles l’ “Asociación Asturiana de Amigos de la Naturaleza”.