Xorrez la participación nel Concursu de pintura rápida d’Uviéu

El VII Concursu de pintura rápida “Ciudá d’Uviéu”, entamáu dende los centros sociales municipales, rexuntó esta selmana pasada en Trascorrales y la so redolada a más artistes que nunca.

Formalizáronse 31 inscripciones en total y cinco fueron na categoría xuvenil, pa participantes d’ente 14 y 17 años. El ganadores del certame fueron Montserrat Valera Mud, como profesional; Néstor López Cases ente los aficionaos y nel grupu de los más nuevos Irene Casal García.

El concursu empezó a los trés de la tarde y cerróse a los siete. Isabel Vega, al mandu de la organización, comentó que nesta edición ampliaren el radiu d’acción nel que el pintores pueden trabayar, hasta les places de la Catedral, del Paragües y el Fontán. Isabel Vega esplicó qu’evitar les inclemencies meteorolóxiques foi la principal razón del treslláu del certame de pintura del Campu San Francisco, onde se celebraba los primeros años, a Trascorrales.

Dalgunos de los concursantes viaxaron dende otres localidaes asturianes pa participar na prueba uvieina y son yá veteranos nel certame. Foi’l casu de Manuel Oteru, de Xixón, que cuando se celebraba nel Campu ganólo na categoría d’aficionaos. Anguaño escoyó como tema la fonte de la plaza de la Catedral. El so compañeru na asociación Acuarelastur José Balseiros, d’Uviéu, debutó ayeri nel concursu con una acuarela de la Corrada del Obispu.

La xixonesa Montserrat Varela, ganadora d’esta edición de la prueba de pintura rápida d’Uviéu, alzóse hai un par d’años col primer premiu del concursu de Bueño.