Portada Conceyos Xixón ye’l principal destín de los 410 docentes qu’aprobaron la oposición

Xixón ye’l principal destín de los 410 docentes qu’aprobaron la oposición

by redacción asturnews

La Conseyería d’Educación fixo publica ayeri l’axudicación de los destinos de los nuevos funcionarios en práctiques en función de les necesidaes de profesoráu esistentes nos institutos. Xixón, Uviéu, Avilés, Llangréu, Mieres, Siero y Llanera van acoyer al 65% de profesores que s’incorporen con plaza al sistema educativu asturianu.

Un total de 410 (336 d’Educación Secundaria y 74 de Formación Profesional) fueron finalmente les persones qu’aprobaron la oposición educativa, un procesu para’l qu’había convocaes 450 places. Nel casu de Secundaria, 82 van trabayar en Xixón, el 24% d’esti cuerpu; 67 n’Uviéu, venticuatro n’Avilés, diecinueve en Llangréu; dieciocho en Mieres, dieciséis en Siero y nueve en Llanera. El restu va desempeñar el so llabor en 31 conceyos de la rexón.

Nel casu de FP, va ser Llangréu’l conceyu que más docentes reciba: dieciocho en concretu. Siguiránlu Xixón (14), Uviéu (12) y Avilés (8). Los funcionarios en práctiques restantes van partir ente Mieres, Castrillón, Siero, Noreña, Valdés, Tapia de Casariego, Samartín del Rei Aurelio, Navia, Llaviana y Ayer. Van Tomar posesión del destín asignáu’l 3 de setiembre.

Tamién ayeri publicáronse los destinos axudicaos a profesoráu en comisión de servicios procedente d’otres comunidaes: 32 de Secundaria, once de Primaria, dos de Conservatorio y unu de la Escuela Oficial d’Idiomes.

Tamién te podria gustar