Xixón y la Fundación Bequal roblen un conveniu pa la igualdá d’oportunidaes na discapacidá

Xixón y la Fundación Bequal roblen un conveniu pa la igualdá d’oportunidaes na discapacidá
18 ochobre 09:20 2021 Imprimir

El Conceyu de Xixón y la Fundación Bequal roblaron esta selmana pasada un conveniu  coles mires d’establecer un marcu de collaboración que dexe asegurar la igualdá d’oportunidaes y la non discriminación de les persones con discapacidásobremanera no que se refier a participación na comunidá y nel accesu al empléu.

La firma d’esti conveniu realizóse nel marcu del Proyectu Persones, xornaes entamaes pol Conceyu de Xixón, que se celebren dende ayeri na Antigua Escuela de Comerciu, y tán dirixíes al personal municipal.

La Fundación BEQUAL ye una entidá ensin ánimu d’arriquecimientu dedicada a la certificación d’organizaciones públiques y privaes, comprometíes cola inclusión de les persones con discapacidá, como ye’l casu del Conceyu de Xixón, reconociendo a aquelles organizaciones qu’incorporaron polítiques que favorecen la inclusión llaboral d’estes persones. El colectivu de persones con discapacidá supera los 4 millones en toa España, ente que en Xixón falamos, aprosimao, d’unes  27.000 (un 10% de la población).

Ente los ámbitos de collaboración qu’inclúi’l conveniu destaca l’impulsu y desenvolvimientu del Modelu Bequal nel ámbitu d’actuación del Conceyu de Xixón, los sos Organismos Autónomos y Empreses municipales, según ente los grupos d’interés con quien se rellacionen, como ferramienta que dexa acreditar la so responsabilidá social en relación coles persones con discapacidá.

Coles mesmes, al traviés d’esti conveniu desenvolveránse acciones formatives de sensibilización y espardimientu de la Responsabilidá Social Corporativa (RSC) ente’l personal municipal; la ellaboración d’estudios que dexen midir el grau de contribución del Conceyu de Xixón a la RSC; el fomentu de la contratación pública socialmente responsable, favoreciendo l’accesu de persones con discapacidá al empléu públicu; o la esploración de la constitución d’aliances públicu-quitaes pal llogru d’estos oxetivos.

El certificáu Bequal reconoz el compromisu de les organizaciones en materia de RSC y discapacidá, organizaciones que demuestren el so compromisu cola sostenibilidá y cola Axenda 2030, contribuyendo al cumplimientu de los Oxetivos de Desenvolvimientu Sostenible (ODS). Apostar pol Sellu Bequal nun significa namá ser una organización socialmente responsable cola discapacidá, supon tamién alliniase cola Axenda Internacional y apostar per un mundu más sostenible.

  Categories: