Xixón va ser la see de les XIV Xornaes Nacionales de Podcasting

L’Asociación Asturiana de Podcast entama, col sofitu de Xixón Impulsa, en Llaboral Ciudá de la Cultura trés díes de ponencies, charres y talleres coles principales figures del sector nes  XIV Xornaes Nacionales de Podcasting.
Les Xornaes Nacionales de Podcasting (JPOD), qu’anguaño celebren la so XIV edición, van tener llugar en Xixón los próximos 20, 21 y 22 de marzu. Van tar entamaes pola Asociación Asturiana de Podcast, que dirixe’l periodista David Remartínez, y van traer cientos de persones la ciudá. Too ello pa tratar l’estáu, evolución y perspectives del sector, con empreses, profesionales y aficionaos.

El programa de les xornaes, que les sos entraes yá pueden adquirise al traviés d’un crowfunding qu’inclúi distintos pagos pa compradores, inclúi charres, conferencies, talleres y grabaciones en directu. Ente los podcast que van tar presentes atopen Hotel Jorge Juan, de Javier Aznar (Vanity Fair), el presentador Toni Garrido, el director de Radio Nacional Javier Hernández Los MensaHeros, Multisonoro, Series Reality Podcast, Fans Fiction, A La Velocidá Absurda, Órbita Friki, Tebeísmos o Movides Minúscules.

Y mientres l’intre del eventu, que cunta como patrocinadores con delles de les empreses más relevantes del sector, va tratase tamién la situación del podcast, la so evolución y les sos perspectives de futuru. Un alderique nel que dende l’Asociación Asturiana de Podcast vamos tratar d’arreyar al mayor númberu d’empreses de la rexón posible. Pa favorecer l’apaición de nuevos programes na zona, que creza’l númberu d’aficionaos y que los que yá conocen el formatu puedan ameyorar les sos habilidaes, van celebrase talleres de guion, llocución y edición.

La inauguración de les xornaes, que cunten cola plataforma Ivoox como patrocinador principal y el sofitu del Xixón Convention Bureau, va tener llugar na tarde del vienres, 20 de marzu, y Xixón va convertise entós, si’l coronavirus nun lo torga, na capital nacional del podcast. Les actividaes, coles mesmes, van dir más allá de Llaboral Ciudá de la Cultura ya inclúin dellos actos n’otros locales de la ciudá. L’actu de clausura va tener llugar al mediudía del domingu 22 de marzu. Aquel día, cientos de persones visitaríen la ciudá pa esfrutar de les JPOD2020.

Toa la info na web jpod.es