Portada Comunicación Xixón Sí Puede pide un Plan seriu de normalización

Xixón Sí Puede pide un Plan seriu de normalización

by redacción asturnews
El portavoz de Xixón Sí Puede, Mario Suarez del Fueyo

Xixón Sí Puede va presentar nel próximu aconceyamientu del plenu municipal un ruegu pa que’l gobiernu xixonés dote al conceyu d’un nuevu Plan Estratéxicu Municipal d’Usu de la Llingua Asturiana, que desenvuelva la normalización llingüística pa la llexislatura.

Cumpliendo pa col so programa lectoral, Xixón Sí Puede dexó bien nidia na presentación de la propuesta pol so portavoz, Mario Suárez del Fueyo, que nel Plan tienen de definise pa los próximos dos o cuatro años “toles prioridaes, oxetivos, indicadores, ámbitos d’actuación, responsables, recursos, plazos y mecanismos de siguimientu y evaluación pa la normalización linguística del asturianu”.

Suárez del Fueyo amosó la falta de protección de la llingua que “ta llevando al asturianu a una situación de peligru que merez una acción decidida per parte de les instituciones” y fizo alcordanza de que tanto’l Plan de Normalización Social como les ordenances vixentes dende l’añu 2008 nun llegaron a aplicase nin a cumplir la mayoría de los sos puntos en dengún momentu, porque’l gobiernu socialista nun tenía enfotu dengún nello.

Xixón Sí Puede quier que’l plan sirva pa visibilizar la llingua asturiana col so usu nos medios de comunicación, anuncios y comunicaciones del equipu de gobiernu, publicidá institucional y eventos entamaos poles empreses municipales. Xixón Sí Puede espera que’l plan pueda tar en marcha l’añu entrante xuntu con otres acciones como l’impulsu de la toponimia oficial del conceyu, la promoción de los productos culturales n’asturianu, el fomentu del usu del asturianu nel ámbitu familiar o la puesta en marcha d’acciones específiques nos ámbitos educativos como les escueles de 0 a 3 años, que son de competencia del Conceyu.

Pa implementar esti plan, el conceyal envaloró que ye preciso dotar a la Oficina de Normalización Llingüística del personal y los recursos necesarios pa llevar alantre esti trabayu, como tamién p’aplicar les ordenances en vixencia hasta que s’aprueben otres.

Tamién te podria gustar