Xixón puxa pol Grau en Ciencies de l’Actividá Física y Deporte

Presentáu nel Conceyu de Xixón el martes 13 de marzu’l proyectu de la ciudá pal Grau en Ciencies de l’Actividá Física y Deporte na Universidá d’Uviéu, el Rector de la Universidá, Santiago García Granda, salió esti día al pasu plantegando la posibilidá de que seyan delles les ciudaes qu’acoyeran el nuevu Gráu.

Los conceyales Jesús Martínez y Fernando Couto informaron esta selmana sobro los distintos aspeutos de la propuesta que yá foi unviada al  rector de la Universidá d’Uviéu y al conseyeru d’Educación y Cultura. La implantación en Xixón del grau en Ciencies de l’Actividá Física y el Deporte sería la consecuencia lóxica na so opinión de la trayectoria deportiva que tuvo xuna ciudá como la nuesa. Dende va décades, Xixón lluchó por convertise nun centru del deporte, non yá asturianu, sinón nacional; rematáu pol gran finxu de la distinción como Ciudá Europea del Deporte nel añu 2016.

L’impulsu del Conceyu y les entidaes de la ciudá a l’actividá deportiva ocupó un llugar esencial na axenda municipal de los últimos años. Un impulsu que tien como fin últimu ameyorar la vida y la salú, llogrando xuna ciudá más viva, xuna ciudá activa y meyor.

Al traviés de la completa rede d’espacios deportivos colos que cunta la ciudá, la implantación del grau en Xixón ye ensin dulda una bona alternativa pal desenvolvimientu de los estudios, que ye lo más importante percima d’otres considerancies ayenes al ámbitu académicu. Les instalaciones de la Universidá Llaboral, tantu n’espacios docentes como deportivos, cola renovación de los campos d’h.oquei, fútbol y rugby, amás del nuevu Hospital Universitariu de Cabueñes, y la Residencia d’Estudiantes que la so construcción ye inminente, ufierten un espaciu con grandes posibilidaes. A toos ellos suman otros espacios como’l Complexu Deportivu de Les Mestes, el Palaciu de los Deportes, les trés sableres urbanes, el Puertu Deportivu o la rede de piscines municipales.

La redolada d’allugamientu, en plena Milla de la Conocencia, ye aparente p’ampliar el clima universitariu que yá empecipiaron nel so día les facultaes d’Inxeniería, Ciencies Sociales y la UNED y déxanos amestalo directamente cola investigación, aprovechando les sinergias yá establecíes n’otros campos.

Presentación de Xixón Grau en Ciencies de l’Actividá Física y Deporte