Xixón pruye avanzar a la oficialidá que Barbón propón pala nueva llexislatura

by redacción asturnews | noviembre 10, 2017 12:14 pm

El Conceyu Xixón pruyó esti xueves al Principáu y a los partios políticos pa qu’avancen escontra la oficialidá, nel mesmu día qu’Adrián Barbón prometía algamar esa oficialidá pala nueva llexislatura.

Na sesión plenaria d’esti xueves nel conceyu Xixón, XSP, IX y el PSOE apautaron una declaración consensuada qu’empobina escontra la oficialidá pero ensin prieses. Asina, falose d’una oficialidá “progresiva” o “atenta”, que s’afaiga a la realidá sociollingüística del país y que llogre’l consensu, yendo a la gueta d’una amplia mayoría nel Parlamentu. Ersa ye la vía na que quieren empezar a trabayar yá los colectivos asturianistes una vegada que’l PSOE confirmara ayeri que nel so programa electoral pa 2019 van incluyir l’asturianu como llingua cooficial.

Dempués de décades d’espera, nun paez que l’aselu col que la FSA quier encetar esti asuntu vaiga amurniar a les organizaciones civiles de defensa del idioma la so llucha por que los que falen asturianu tengan los mesmos derechos que los que falen castellán n’Asturies.

Toles voces coincidieron en que l’asturianu pue ser oficial mientres la llexislatura 2019-2023, porque asina lo comprometió’l secretariu xeneral, Adrián Barbón: indicó que ye partidariu d’aguardar al desenllaz del procesu de reforma constitucional qu’agora empieza nel Congresu y que, de nun cuayar, el so partíu va llanzar la reforma del Estatutu d’autonomía pa impulsar la oficialidá.

Ábrese darréu la hipótesis d’una oficialidá ‘en diferío’, qu’empezaría cola aprobación na Xunta d’un dictame qu’abra’l camín escontra la reconocencia del asturianu -va haber que ver si los grupos son capaces d’apautar- pero que dexe’l so materialización pa la próxima llexislatura.

Barbón dixo qu’agora nun hai tiempu pa encetar un alderique de tantu caláu. Prefier esperar al desenllaz del procesu de revisión del Estáu autonómicu y de reforma de la Constitución.

Source URL: http://asturnews.com/xixon-pruye-avanzar-a-la-oficialida-que-barbon-propon-pala-nueva-llexislatura/