Xixón prepara locales pa dar clases en Primaria

Xixón prepara locales pa dar clases a alumnos de quintu y sestu de Primaria, mentantu que’l Principáu quier afitar ratios de 15 estudiantes per aula y recláma-y collaboración p’atopar espaciu nos colexos.

L’alcaldesa Ana González anunció ayeri que va habilitar locales ya instalaciones municipales por que los alumnos xixoneses de quintu y sesta de Primaria puedan empecipiar el cursu y recibir ellí clases presenciales n’edificios cercanos a los sos colexos. En axuntándose ayeri n’Uviéu cola conseyera d’Educación, Carmen Suárez, y la directora xeneral de Planificación ya Infraestructures Educatives, Ana Isabel López Isla, esplicó que’l Principáu pidió-y collaboración d’esta forma pa encetar con garantíes la vuelta a los colexos el próximu mes de setiembre y cubrir, siquier en parte, les necesidaes d’espacios fora de los mesmos centros escolares.

La rexidora espunxo que la Conseyería d’Educación «trabaya sobre ratios de 15 alumnos por aula n’Infantil y Primaria», polo que se fai necesario buscar edificios de titularidá municipal cerca de les escueles onde poder «afaer» a los dos últimos cursos de Primaria. Lliberaos d’estes aules, Principáu y Conceyu tán convencíos de que los 40 colexos públicos y alcordaos de Xixón van poder afaer meyor los sos espacios disponibles.