Portada Conceyos Xixón pon en marcha un proyectu piloto pa prevenir adicciones na mocedá

Xixón pon en marcha un proyectu piloto pa prevenir adicciones na mocedá

by redacción asturnews

La Fundación Municipal de Servicios Sociales vieno acabante poner en marcha un proyectu piloto pa prevenir les adicciones en mocedá al traviés de la so propia participación.

Llevóse a cabu en collaboración cola Fundación Mar de Borrina, cola fin de favorecer factores de protección y tomar de decisiones positives n’adolescentes nel marcu del Plan Municipal d’Adicciones 2019-2024 del Conceyu de Xixón.

Dientro d’esti proyectu, desenvolviéronse acciones formatives empobinaes a esi sector de la población, a families y a profesionales de la infancia y l’adolescencia; tamién talleres coles y los mozos como protagonistes, quien crearon la campaña ‘La Bona Fiesta’, resultáu d’esti proyectu. Son trés cartelos escurríos con criterios de salú, nos que s’enceten conductes específiques na adolescencia ya incorporen la percepción de riesgu nel consumu de sustances. Podrán vese a partir del llunes nos mupis de la ciudá.

L’oxetivu d’esti proyectu integral ye incorporar la perspectiva de xéneru na práctica profesional al traviés d’acciones formatives que dexen la detección de dificultaes y les respuestes preventives; y trabayar la relación ente xéneru y consumu de sustances, factores de riesgu y protección, sexualidá, y les práctiques de riesgu y vinculación con consumos de riesgu. Coles mesmes, pretende ponese en valor el papel de la familia como factor fundamental de protección frente al consumu o frente a problemes de conducta temprana.

Na presentación de la campaña que tuvo llugar esta selmana pasada, la concejala d’Educación y Mocedá, Natalia González, señaló que la resultancia ye bien positiva, non solo por tol procesu de desenvolvimientu hasta llegar a la creación de la campaña, si non tamién pola mesma campaña, yá que de xuru los mensaxes que se llancen dende l’adolescencia a los sos iguales sían más efectivos.

Tamién te podria gustar