Xixón Fala en 3 cita 17 participantes na so primer edición

Xixón Fala en 3 cita 17 participantes na so primer edición
15 avientu 10:58 2018 Imprimir

Esti sábadu, a les cinco y media la tardi, na Escuela Comerciu de Xixón va desenvolvese Xixón Fala en 3 que cita 17 participantes na so primer edición, separtaos en dos estayes sigún presenten proyeutos que cinquen a temes de divulgación o venceyaos a la cultura y la realidá asturianes.

El concursu Xixón Fala en 3 va consistir nuna competición, n’asturianu dafechu, onde se va presentar un tema, una idea, una investigación, un proyeutu, un problema social, etc. con munchu procuru y cola mayor calidá llingüística posible énte un públicu non especializao, xeneralista y variao. Los temes a tratar nel concursu van tener un rexistru cultu o académicu: hai que lu respetar y preparar el tema acordies con ello.

Esti concursu ofrez a la ciudadanía una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van algamase cotes altes de prestixu y normalización en tola comunidá asturfalante.
No que cinca al públicu, ye una perbona manera d’abrir mires y d’averase a un conocimientu, anque seya esbozáu, de temes mui estremaos.

Van presentase a esti concursu persones mayores d’edá con esplicaciones comunicatives curties d’estremáu calter y que respuendan al enfotu del concursu. La presentación del tema habrá ser individual. Cada participante habrá esponer el tema en 3 minutos esautos, d’una manera clara y concisa. La presentación habrá ser dafechu n’asturianu y habrá emplegase un rexistru cultu.

Los temes que se van presentar divídense en dos estayes: A.Temes venceyaos a la cultura y la realidá asturiana (por exemplu: antropoloxía, toponimia, baille, historia, sociollingüística, reconversión industrial, nueves formes de turismu y perspectives de futuru, etc.). B. Temes de divulgación, non venceyaos únicamente a Asturies (por exemplu: vida intelixente n’otros planetes, homeopatía y pseudociencia, crianza con apegu, enerxíes renovables y cambiu climáticu, etc.).

Loading Facebook Comments ...