Xixón cellebra’l cuartu centenariu de ‘El Quijote’ con una esposición “única” de llibros, monedes y grabaos

Xixón apúntase con antelación a les conmemoraciones del cuartu centenariu de ‘El Quijote’. L’Ayuntamientu de la ciudá entamará en xineru prósimu una esposición cuyos organizadores prometen “única”, basada nuna rica colección particular de grabaos, sellos y monedes, y na que s’amosarán dos ediciones de la obra de Miguel de Cervantes editaes en 1605 y custodiaes pola Universidá d’Uviéu.

La iniciativa, comisariada por Jesús Peláez, foi presentada esta mañana pola conceyala de Cultura de Xixón, Mercedes Álvarez, como una amuesa “única ya inédita n’España”, gracies a la singularidá de los más de 3.000 llibros, sellos, monedes, grabaos y fotoimpresiones alusives a la magna obra de Cervantes que Ramón Álvarez Viña foi acumulando nos últimos cincuenta años a partir de los sos primeros viaxes al estranxeru por sides llaborales.

Según aseguró’l comisariu de l’amuesa, ésta “tendrá un pretendíu calter didácticu y docente, a la vez que buscará l’almiración con aprovechamientu intelectual”, a partir de tres estayes estremaes: Una contestualización hestórica y lliteraria de ‘El Quijote’, una serie de talleres empobinaos a escolinos y la esposición propiamente dicha de les pieces, ente les que figurarán les ediciones que Jorge Rodríguez y Juan de la Cuesta asoleyaron hai agora 400 años, consideraes de les primeres del universal rellatu cervantín.

El tributu a ‘El Quijote’ entamáu pol Ayuntamientu de Xixón dirá más allá de l’amuesa temporal de los elementos qu’integren la esposición, yá que’l Consistoriu xixonés busca un allugamientu afayadizu pa la colección particular d’Álvarez Viña, cedida yá al municipiu pa la so puesta a disposición del públicu con calter permanente.