Xixón celebra’l 150 aniversariu de la tabla periódica de Mendeléyev

Xixón celebra’l 150 aniversariu de la publicación de la tabla periódica de Mendeléyev y pa conmemorar esti finxu y esparder y divulgar la química, los elementos y les sos peculiaridaes la Oficina de Normalización Llingüística edita una tabla periódica y una baraxa de los elementos n’asturianu.

A lo primero de la década de los 60 del sieglu XIX, na Universidá Estatal de San Petersburgo, un químicu rusu, Dimitri Mendeléyev, propunxo representar y ordenar tolos elementos conocíos nuna tabla acordies cola so composición y propiedaes. Al disponelos d’esta manera entamó a predicir elementos qu’entá nun se conocíen cambiando’l cursu de la investigación química pa siempres. Depués de dellos años d’investigación, en 1869, Mendeléyev asoleyó la so primer tabla periódica colos 62 elementos que se conocíen hasta la fecha colocaos horizontal según la so masa atómico y vertical en grupos o families químiques.

N’homenaxe a esti fitu científicu y col envís de poner dellos talleres n’Educación Secundaria, la Oficina de Normalización Llingüística de Xixón vieno acabante espublizar una tabla periódica de los elementos n’asturianu con ilustraciones qu’amuesen en qué oxetos se pueden atopar anguaño, amás d’información sobre personalidaes bien importantes pa la química universal. A la tabla súmase una baraxa de los elementos diseñada pa xugar en grupu, usando les sos carauterístiques principales y los datos históricos y etimolóxicos de caún.

Descarga equí la Tabla periódica y La baraxa de los elementos