Xixón celebra los VII Alcuentros de la mocedá cola llingua

26 abril 10:57 2010 Imprimir

Mañana, 27 d’abril, van celebrase nel Muséu del Pueblu d’Asturies los sétimos Alcuentros de la Mocedá cola Llingua: “Saca la Llingua”, nos que participarán alredor de seiscientos rapazos que dan llingua asturiana nos Institutos de Xixón del IES Calderón de la barca, IES Doña Ximena, IES Emilio Alarcos, IES Fernández Vallín, IES Xovellanos, IES Mata Xove, IES Montevil, IES Roces, IES Rosario Acuña, IES Universidá Llaboral, IES Númberu 1, IES Padre Feijoo y del Colexu San Llorienzo. Ente les actividaes: xuegos tradiciones, yinkanes y un karaoke n’asturianu.

El tendayu del pueblu d’Asturies acueye les celebraciones. Los xuegos tradicionales van celebrase nel prau del muséu, ente los que se van practicar tán los bolos, la llave, los zancos, la rana, tiru cuerda, tiru al palu…Los guah.es van poder participase tamién nuna Yinkana cultural y biolóxica, na que, en grupos, tendrán que trabayar a comuña pa dir pasando per distintes pruebes que consisten en dir atropando dalguna información y alcontrar dellos oxetos que tengan que ver cola diversidá biolóxica.

La Oficina de la Llingua tien preparaos amás dellos talleres de rap, baille, cocina, doblaxe, cómic, cuentacuentos y cifres y lletres. Amás, del yá citáu, karaoke n’asturianu, qu’entamó l’añu pasáu y que cunta con cantares como “Tengo de rondar to valle” y “So vaqueiru”, pieces tradicionales popularizaes pol dúu Nuberu; “Chacho” y “Nun yes tu” del grupu de Tolivia (Llaviana) Los Berrones; la versión de “Chalaneru” fecha a comuña ente los hermanos Tejedor y el cantante Chus Pedro; “Rapaza nacionaliega” y “Canciu d’amor” de Dixebra; “Mexé na caleya”, “La capitana”, ún de los cantares más populares del músicu xixonés Carlos Rubiera; “Sonia” y “Los suaños, suaños son” de la formación de ska-punk de Candás Skama la Rede; y el tema de l’agrupación infantil Xentiquina “Bocadillu rock”.

  Categories:
Loading Facebook Comments ...