Xixón acueye esta nueche la final del V Concursu de Gaita de Xixón

El V Concursu de Gaites de Xixón entama la recta final cola cellebración de la fase final tres una selmana d’eliminatories. Les actuaciones nes diferentes categoríes van tener llugar güei na Plaza Mayor de Xixón a partir de les siete la tarde.

El certame, del que se cellebra esti añu la quinta edición, ta organizáu pol departamentu de festeyos del Teatru Jovellanos de Xixón al travies de l’Asociación Cultural Banda de Gaites Noega.

Na categoría d’adultos, los gaiteros que van optar al triunfu son Ruben Alba, Pablo Carrera, Ángel Domingo, Llorián García, Daniel González, David Granda y Borja Rodil.

D’ente los participantes infantiles llegaron a la gran final Francisco Fernández, Jesús Fernández, Ruben García, Hugo López, Adrián Múñiz, Germán Peralta y Juan Yagüe.

Por últimu na especialidá de pareyes con gaita y tambor el trofeu dirá a parar a les menes d’una de les siguientes formaciones: Ruben Alba y Marcos García, Pablo Carrera y Jose Antonio Carrera, Ángel Domingo y Sergio Rubio, Jesús Fernández y Jose Antonio Bustamante, Daniel González y Marco A. Guardado e Iván González y Arsenio Ruiz.

Na modalidá de pareyes instrumentales, van disputar Jesús Fernández y Lucía Menendez, Sergio García y Hector Castro y Llorián García y Andres García.

Nesta fase final, que se va disputar güei martes 31 y mañana miercoles 1 d’agostu, los participantes van tener qu’interpretar dos temes, un de llibre elección y otru obligatoriu a escoyer d’ente los siguientes: Saltón 335 del Cancioneru de Torner, Xiringüelu, El saltón de centro, Marcha Vaqueira, Muñeira d’antón, Muñeira de Tormeleo, Muñeira de Lliberdón, Alborada del Paxarín, Jota de la Madalena, Jota dos Cautas, y Jota de la Rosa.

Los participantes tocarán un másimu de 10 minutos y tendrán qu’usar la gaita tradicional asturiana d’un roncón en cualquiera de les sos modalidaes: grillera, rednda o tumbal.

La lista genadores d’esti V Trofeo de Gaites de Xixón va asoleyase el 5 d’agostu durante la cellebración del Día d’Asturies en Xixón y la entrega de premios va ser el Domingu 12 d’agostu durante la Selmana Grande de Xixón.