Portada Cooperación XEGA opina sobre les declaraciones nes que Felechosa comparaba los drechos de los asturfalantes colos de los transexuales

XEGA opina sobre les declaraciones nes que Felechosa comparaba los drechos de los asturfalantes colos de los transexuales

by asturnet

La organización Xente Gai Astur (XEGA) emitió ayeri un comunicáu nel qu’opinaba sobre les declaraciones del conceyal de Cultura del Conceyu d’Uviéu, Xosé Suárez Arias-Cachero “Felechosa”, que pa la organización gai busca “l’enfrentamientu ente los drechos de los transexuales y los de los falantes d’asturianu”. Pa XEGA, nes sos declaraciones “l’edil da por fecho que les persones transexuales tienen nestos momentos mayores drechos que los usuarios de la llingua asturiana”, lo que ye una “amuesa del so despreciu p’hacia les persones transexuales”.

Les declaraciones de Felechosa yá provocaren qu’esti sábadu fuere llamáu pol PSOE d’Uviéu, “abertzale” y acusáu d’utilizar l’asturianu “pa medrar políticamente”.

XEGA manifestó tamién tar ablucada énte unes declaraciones “que muestren claramente mala fe ya inorancia per parte de quien les emitió”.

Nel comunicáu comenten que “Creemos que namás cuando se quier xugar a enfrentar colectivos se pueden facer unes declaraciones como les emitíes la pasada selmana pol edil popular yá que de les mesmes deduzse perfectamente’l so deséu d’enfrentar les reivindicaciones del colectivu transexual coles que piden la oficialidá llingüística na nuesa comunidá autónoma”.

XEGA incidió nel comunicáu “na llexitimidá de dambes dos reindicaciones”, nun viendo necesario nin correcto “abrir una carrera pa ver cuála tien que se solucionar primero”.

El PSOE llama “abertzale” a Felechosa, que comparó los derechos de los asturfalantes colos de los transexuales

Tamién te podria gustar