Xaviel Vilareyo estrena güei “La igua” dientro de los actos de l’Arribada

29 setiembre 08:50 2009 Imprimir

Güei martes, a les seis de la tarde y dientro de los actos de l’Arribada, va proyectase “L’acorazáu Potemkin”, con rótulos n’asturianu, será nel Salón d’actos del CCAI. A les 19,30, va presentase’l llibru últimu de Rafael Rodríguez Valdés, “Discursos llingüísticos y movimientu obreru na Asturies decimonónica”, ganador de la primer edición del Premiu Fierro Botas d’ensayu.

La xornada va pesllase col obra de teatru “La igua”, de Xaviel Vilareyo, colos actores María Xesús Rodríguez y Jesus Menéndez, estrenu que va tener llugar nel Salón d’actos del mesmu edificiu xixonés.

L’asistencia al estrenu d’esta obra ye gratuíta. “La igua” ye una metáfora de los conflictos internos colos que s’enfrenten los ideales y ambiciones de cualesquier personaxe humanu inmersu nun mundu conflictivu y problemáticu y onde la solución y la escoyeta llibre del destín faise cada vegada más abegosa.

Xaviel Vilareyo (Mieres del Camín, 1967) estrena con ésta la so tercer obra dramática, dempués de la puesta n’escena de les sos comedies anteriores titulaes “De rebaxes na sablera” y “El misteriu del pelu roxu” represetnaes nel Teatru Filarmónica el pasáu mes d’abril. Nel añu 2009 recibió’l Premiu de Teatru de l’Academia de la Llingua Asturiana pola obra “La fuxida”.

  Categories:
Loading Facebook Comments ...