Portada Lliteratura Xandru Fernández retrata l’argayu agónicu de les cuenques mineres na so última novela

Xandru Fernández retrata l’argayu agónicu de les cuenques mineres na so última novela

by asturnet

L’escritor Xandru Fernández vuelve al escenariu real y manifiestu de l’agonía de les cuenques na so última novela “Les ruines”(Trabe, 2005), un retratu despiadáu del paisaxe humanu y material que s’esborria al empar qu’un modu de vida pa dexar namás escombrios. Ambientanda nun momentu cercanu na memoria, el tiempu del añu 2003, y nes mesmes coordenaes de la Poladura postindustrial na que Fernández tien asitiao l’acción narrativa de les sos noveles, “Les ruines” tenta “dar fé”, en palabres del autor, “d’esi paisaxe de ruines materiales y humanes”.

La última novela de Xandru Fernández tenta escarbar ente les ruines d’un escenariu non mui allonxáu nel tiempu, inda sí lo bastante “pa consiguir la distancia necesaria cola que facelo, porque narrar en tiempu real o nel presente raramente da bonos resultaos, el presente más inmediatu nunca nun ye novelable”, afirma’l so autor. Si bien na so obra anterior “Los homes de bronce” Fernández treslladaba l’acción a la dómina de les guerres carlistes, nes sos palabres “ello nun quería dicir que la hestoria nun pudiere ocurrir en cualquier otra dómina y coles mesmes esmoliciones y pasiones de los personaxes”, de la mesmamiente “en ‘Les ruines’ l’escenariu temporal ye’l de Poladura diez años después de haber falao d’ella nes primeres noveles, tamos nel 2002 y esa realidá agónica, terminal, que ye la d’una parte importante d’Asturies y del mundu actual, nun fexo más que deteriorase, les coses nun foron a meyor dende entós y el terrenu de les ruines materiales y humanes ye güei más estensu tovía”.

Tocante al rumor hestóricu de fondo de la hestoria, los ecos llonxanos de la guerra civil, Xandru Fernández entaína a desfacer un enquívocu sobre esti fechu que “nun sé bien de ónde salió”, afirma, “y ye el de que nin parte de la guerra civil la hestoria nin ta ambientada nesi momentu a nun ser un episodiu onde apaez esa buelga nel pasáu d’un de los personaxes, la novela desenvuélvese en 2002”. Preguntáu si esa buelga de la guerra civil y les sos consecuencies inda ye bultable na realidá actual de les cuenques Fernández cuenta que “paezme cada vez ye más débil, como buelga o rastru ye más bien de calter arqueolóxicu o pola obsesión de cuatro, nun creo que sea una referencia hestórica pa les xeneraciones qu’agora viven ellí, ye un ecu cada vez más llonxanu, pa muncha xente la guerra civil queda tan llonxe na memoria como les guerres carlistes”.

El paisaxe humanu que va retratando “Les ruines” ta sacáu de la propia realidá “ensin tener que buscar muncho más alló nin recurrir a la imaxinación, nes cuenques vense esos personaxes que dexó la situación actual, la muyer del prexubiláu que nun ye asumir lo que sucede y cai na depresión más fonda, el rapaz que marcha fuera a buscar trabayu y nun ye quien a vivir ensin volver otra vez a un mundu onde nun tien futuru, la vieya que descubre de sópitu a los sesenta y tantos años les virtúes del hachís, los mozos destruíos por tantes coses nes que se vieron envueltos…son personaxes que puedes atopar ende, nun fai falta imaxinalos”.

Xandru Fernández trabaya anguaño n’otra novela “ambientada tamién na cuenca, pa nun variar”, bromea l’autor, y que tenta bucear nun tiempu cercanu al de “Les Ruines”, el de la xeneración perdida y sescudida pola influencia de los movimientos y les modes moces de los años 70 y 80: “los efectos del movimientu hippie y de los que vinieron después, cola so cultura d’emponderanza de l’autodestrucción y la galbana como formes de vida, nes cuenques foron absolutamente desastrosos”, diz Fernández, “yo creo qu’en nengún otru llugar d’Asturies y nun sé si del mundu abondaron tanto esos hippies y punkies tan enfotaos na causa, y nos qu’igual atopamos una desplicación a que per equí abonde güei tantu taráu, mesmo basta mirar pal movimientu asturianista, onde hai elementos qu’ensin dulda hubieron beber neses fontes”. La nueva novela tenta afondar na realidá d’eses xeneraciones perdíes nun tiempu crucial pa la construcción de la realidá qu’anguaño conocemos: “interésame cada vez más volver a esi tiempu, col envís de procurar dalgunes respuestes que sé tán ehí somorguiaes, nesos díes tan estraños”, afirma l’autor de “Les ruines”.

Tamién te podria gustar