Portada Conceyos “WarCry Symphonic” llega a Avilés xuntu con un proyectu de formación musical

“WarCry Symphonic” llega a Avilés xuntu con un proyectu de formación musical

by redacción asturnews

El sábadu 24 de payares nel Centru Niemeyer la banda asturiana de heavy metal WarCry va actuar acompañada por músicos de la Orquesta Sinfónica Julián Orbón y de la Nueva Orquesta Sinfónica de Cantabria, so la batuta del director Miguel Navarro.

Mientres la selmana previa, alumnáu de los institutos d’Avilés y del Conservatorio va participar en sesiones de didáctica musical al cargu de los mesmos integrantes de WarCry, nel Teatru Palacio Valdés.

La conceyala d’Educación y Cultura, Yolanda Alonso, presentó el llunes 7 d’ochobre en rueda de prensa’l conciertu “WarCry Symphonic”, que la banda asturiana de heavy metal WarCry va celebrar el sábadu 24 de payares nel Auditoriu del Centru Niemeyer. Na rueda de prensa tamién tuvieron presente Víctor García, vocalista de WarCry; Carlos Galán, director del Conservatorio Municipal Profesional “Julián Orbón” d’Avilés; y Carlos Cuadros, director del Centru Niemeyer.

La conceyala informó tamién del proyectu de formación musical que los mesmos integrantes de WarCry van desenvolver mientres la selmana previa al conciertu, y que va tar destináu a alumnáu de los Institutos d’Educación Secundaria d’Avilés, según del Conservatorio Municipal Profesional Julián Orbón.

El conciertu “WarCry Symphonic” va ser una ocasión única de contemplar a la banda diez años dempués del so últimu conciertu n’Avilés, naquella ocasión por cuenta de la presentación del album La Quinta Esencia, y d’esfrutar del so repertoriu en versión sinfónica. Para esti conciertu, WarCry va tar acompañáu por una gran orquesta formada per alredor de 60 músicos integrantes tantu de l’avilesina Orquesta Sinfónica Julián Orbón como de la Nueva Orquesta Sinfónica de Cantabria.

Concretamente, los cinco integrantes de WarCry (Víctor García, voz; Pablo García, guitarra; Santiago Novoa, teclaos; Rafael Xugueros, batería; y Roberto García, baxu) van tar arropaos por 20 violinos, 8 violes, 8 violonchelos, 4 contrabaxos, 1 arpa, 2 oboes, 2 flautes, 2 clarinetes, 2 fagotes, 4 trompes, 2 trompetes, 3 trombones, 1 tuba y 4 percusionistas.

El conciertu “WarCry Symphonic” estrenose en 2016 nel festival Lleendes del Rock y, de magar, namái se repitió en dos ocasiones más: nes fiestes de San Mateo 2016 (Uviéu) y nel Teatru Metropolitan de Ciudá de México, en 2017, nel marcu del proyectu Esperanza Azteca, una iniciativa social-musical para neñes, neños y nuevos d’escasos recursos. En “WarCry Symphonic”, les temes de la banda cunten colos arreglos orquestales del avilesín Rubén Díez y son interpretaos so la batuta del prestixosu director Miguel Navarro.

Más información

Tamién te podria gustar