Vuelven les pintaes ofensives na catedral de Santiago de Compostela

La fachada de la Catedral de Santiago de Compostela apaeció la selmana pasada con una serie de pintaes contra la ilesia, el partíu políticu VOX y la monarquía. El Conceyu de Compostela yá condergó esta agresión y afirmó que darréu se dar en la eliminación de les frases.

Pintaes como “Yo nun salí de la to costiella, tu salisti del mio coño” y “Vamos Glayar hasta quedanos ensin Vox” son dalgunes de les amueses que dexaron los vándalos. L’alcalde compostelanu, Martiño Noriega afirmó, al traviés de la cuenta de Twitter del Consistoriu, que ““nenguna xusta reivindicación puede sirvir de coartada p’atentar contra l’heriedu de toes y toos”.

La Policía yá abrió dilixencies pa tratar d’esclariar lo socedío, una situación que yá asocediera n’agostu de 2018, cuando la fachada de Plateríes d’esti templu amaneció con una cara qu’asonsañaba’l maquillaxe d’unu de los miembros más reconocibles de Kiss, el grupu estadounidense de rock duru.

Les inscripciones van ser cubiertes con una lona. Tamién nel Arcu de Xelmírez apaeció una pintura que va ser esaniciada en cauntes que sía posible, afirmen dende’l Conceyu. Dende l’Asociación pa la Defensa del Patrimoniu Cultural Gallego tamién se condergó ta situación, tachándola de “intolerable”. La zona antigua de Santiago de Compostela, declarada Patrimoniu de la Humanidá, ta siendo restaurada pa la celebración del Añu Xacobéu.