Vrienden gana’l concursu de bandes del IX Folkez Blai

15 setiembre 08:40 2014 Imprimir

La formación folk-fusión que representare esti añu a Asturiesn nel Festival Intercélticu de Lorient va tocar el próximu añu nel Getxo Folk y nel Folkez Blai tres vencer nel concursu de grupos del festival folk de Ermua, sigún se conociere esti día. De les seis bandes escoyíes, la formación asturiana de folk-fusión-alternativu contaxó a públicu y xuráu nesta novena edición del Folkez Blai, un de los eventos folk más importantes del País Vascu que se celebra añalmente n’Ermua (Bizkaia).

Caracterizaos pola so frescura y el so folk acústicu innovador, Vrienden impunxéronse frente a los gallegos Alén de Ancos, los estremeños EnVerea, el catalanes Irish Corner y Naia, y los tamién asturianos Duerna. El premiu, amás de 3000 euros en metálicu, va ser tocar el próximu añu nel Folkez Blai y nel Getxo Folk, el festival del xéneru más destacáu del país vecín.

Con esta actuación el grupu pon fin a una intensa xira que los llevó a presentar el so discu debú a escenarios como’l del Festival Intercélticu de Lorient o la Noite Celta de Porcía. A partir del payares, la formación va trabayar en nueves composiciones con vistes a publicar un nuevu discu mientres el 2015.

La asociación de asturianos emigraos al País Vascu, Ixuxú, que fai de ponte sociocultural ente los dos pueblos, tuvo sofitando’l procesu de la participación de Vrienden nesti concursu.

Vrienden ye un proyectu musical frutu de la unión d’amigos que crecieron xuntos desenvolviendo dende’l principiu del so aprendizaxe musical les sos esmoliciones llibres, basaes nel folk principalmente, pero con gran variedá d’influencies musicales. A partir d’una base qu’allugaba gran calidá, molición, orixinalidá y creatividá, llegaron a conformar un estilu musical completu, frescu ya innovador que pretende nun enllancase musicalmente apurriendo siempres una visión bien particular que garantice la diversión y almiración del públicu.

El so formatu, un cuartetu, dexa aprovechar al máximu les posibilidaes d’estos mozos y prometedores músicos de la escena asturiana, que yá llegaron a convertise n’escelentes intérpretes y compositores. Cada músicu esplega toos les sos conocencies y el so potencial, xenerando un estilu personal al qu’ellos mesmos denominen como “Folk-Fusión- Alternativu”.

  Categories:
Loading Facebook Comments ...