Virgili fai anuncia de qu’abandona la direición de la RTPA

El periodista Antonio Virgili fizo esti llunes l’anuncia de la so arrenuncia al cargu de director xeneral de la RTPA que va facer efeutiva na próxima xunta del conseyu d’alministración de la Radio Televisión del Principáu (RTPA) que se va celebrar dientro d’un mes.

Sigún delles fontes qu’ayeri espardieron la noticia, Virgili atribuyó la so marcha a razones personales al empar que treslladó’l so agradecimientu a los integrantes del actual conseyu d’alministración y a los trabayadores de la RTPA.

Virgili ye llicenciáu en Ciencies d’Información y doctor en Comunicación Pública pola Universidá de Navarra (UNAV) y máster en Media Management pola Universidá de Missouri y enantes d’entamar a trabayar na comunicación política n’Asturies foi profesor de Ciencies de la Información na UNAV.

Tres desenvolvese como responsable de prensa na Conseyería de Facienda, foi nomáu en 2007 director de Relaciones Corporatives del ente na etapa en que José Ramón Pérez Ornia taba al mandu de la cadena y cuatro años depués foi designáu como nuevu director xeneral en funciones de la cadena autonómica tres l’arrenunciu de Juan José Guerenabarrena. En 2015, sedría ratificáu nel puestu p col respaldu de 32 de los 45 diputaos de la Cámara -PSOE, PP ya IX- y agora renuncia al puestu cuando y queda menos d’un añu de mandatu.