Villaviciosa celebra esta selmana’l Festival Internacional de la Gaita

05 setiembre 08:32 2012 Imprimir

El conceyu de Villaviciosa acueye estos díes el Festival Internacional de la Gaita. El xueves 6, a les diez y media la nueche, entamen los actos cola III Nueche de la Gaita (Gaites del mundu), un espectáculu de lluz y soníu que va celebrase na Plaza Caveda y Nava y sobre l’Escenariu Sabino Cifuentes, cuntando cola participación de Nico Radin (Breizh Biniou), Jose Manuel Pérez ( Gaita galega), José Manuel Tejedor (Gaita Asturiana), Dani Álvarez (Uilleann pipe) y les bandes Banda Gaites Villaviciosa & amigos y Banda Latira ( Betaña).

A la una la nueche va celebrase una Folk Session nel Café Teatru El Grillu Salvaje.

El vienres 7, los actos van entamar a les seis de la tarde, col Mercáu tradicional nel Parque d’El Pelambre. A les diez y media la nueche un conciertu nel “Escenariu Central” va cuntar cola Banda Latira (Bretaña) y los grupos Aira da Pedra (Lleón), Tuenda (Asturies) y Skama la Rede (Asturies).

El sábadu entama’l mercáu de mañana, a eso de les doce, y media hora más tarde va producise l’actuación de la Banda Gaites Villaviciosa -El Gaitero- y la Banda de Gaitas Castro Bergidum peles cais de Villaviciosa, dando entamu al Festival de Bandes de Gaites.

A les ocho, un pasacais percorrerá La Villa pa rematar a les ocho y media nel “Escenariu Central” onde van participar nel espectáculu les bandes: Banda de Gaites Candás, Banda de Gaites Xácara, Banda de Gaitas Castro Bergidum, Banda de Gaites Ciudá de Cangues d’Onís, Bandina de la Escuela de Musica Tradicional y la Banda de Gaites Villaviciosa -El Gaitero-. La xornada va rematar na media nueche col conciertu de Naheba (Cantabria) y Tejedor (Asturies).

El domingu acaben los actos. A les 12:30 celebraráse l’actuación de les Bandes participantes peles diferentes cais de Villaviciosa. A les siete la tarde, el concursu de Gaiteros Solistes “Memorial Jose Huerta”, nel Escenariu Central, onde se fadrá la entrega de premios a les 22:30 hores, actuando’l ganador media hora más tarde nun chigre a decidir entá.

El pieslle a estos díes centraos na música y la gaita va ponelu la Hector Braga Band (Asturies) a les 23:30 hores.

  Categories:
Loading Facebook Comments ...