Villaverde y García Granda empecipien el trespasu poderes na Universidá

El nuevu rector de la Universidá d’Uviéu, Ignacio Villaverde, y el so antecesor, Santiago García Granda, caltuvieron esta mañana de martes la so primer xunta pa entamar el trespasu de poderes na institución académica.

Foi un alcuentru “bien cordial, nel tonu que los dos esperábamos y queremos”, valoró’l vencedor, que comparte col rector saliente’l propósitu inmediatu de xestionar el cambéu de ciclu de cuenta que nun se detenga nengunu de los procesos que la institución académica tien en marcha.

Ignacio Villaverde, catedráticu de Derechu Constitucional, llogró la victoria’l pasáu vienres frente a García Granda nes primeres elecciones telemátiques de la Universidá. Terminada una guerra electoral que’l ganador calificó como “bronca” y “dura”, la primer asignatura impon-y la elección y designación del equipu que va tutelar la nueva etapa nel rectoráu. Les siguientes, según mesma declaración, plantegen la necesidá d’acometer trés xeres básiques d’orde y reconocencia: “Lo primero va ser roblar una instrucción del Rector que valide l’usu de la firma dixital nos procedimientos alministrativos de la Universidá. Eso precisar de mano a desapexar el problema de hiperburocratización”, asegura. “Lo segundo va ser despidime unu a unu de los miembros del equipu rectoral saliente, porque creo que les instituciones somos bien fríes y bien desagradecíes con persones que, con independencia de lo bien o lo mal que lo fixeren, sacrificaron cuatro años de vida para sirvir a la Universidá. Lo tercero, un analís de la situación económica real de la Universidá, que m’esmolez, y del estáu de los distintos proyectos y convocatories que tán en marcha, porque’l tránsitu ente los dos equipos nun tien de retrasar la culminación d’eses xeres”.