¡Víalo un ciegu!, artículu d’opinión de Xurde Blanco

01 mayu 10:06 2010 Imprimir

Ente les milenta puñalaes traperes que’l gobiernu Areces tien daes a la
llingua asturiana, una de les más dañibles vien de denunciala’l
sindicatu SUATEA, xustu al entamu de los festeyos oficiales de la
Selmana de les Lletres Asturianes.

Resulta que nel currículu d’educación infantil –un bayurosu testu de
dolcenes de fueyes- nun se mienta a la llingua asturiana nin per una
vegada. Énte esto, SUATEA entamó aiciones xudiciales porque l’artículu
10 de la Llei 1/1998, obliga a ufiertar la materia de llingua en toles
estayes educatives. Plantegáu’l pleitu el gobiernu Areces defendióse
afitando que l’enseñu l’asturianu taba previstu na educación infantil y
que si nun apaecía espresamente yera porque nesti nivel nun hai
asignatures sinon aries y dientro de los conteníos de cultura asturiana
atrópase la llingua que ye parte de so. Ente estes afirmaciones el
Tribunal Superior de Xusticia d’Asturies zarró l’asuntu con una
sentencia -perprobetaya por ciertu- desestimando la demanda col
argumentu de que lo reclamao yá taba reconocío. Pero mira per onde,
cuando dende los centros escolares pas y mayestros esixen la presencia
del asturianu nes aules d’educación infantil, la Inspección d’Educación
del gobiernu Areces diz-yos que nun ye posible porque nun ta nel
currículu. Y neses tamos, cola llei burllada y los neños ayenos dafechu
a la llingua materna nel so primer contautu cola escuela.

Al empar que sofitaba esta mísere falcatrúa, el gobiernu Areces, con
retratos y emponderamientos, que nun faltaron, promete-y una sede ñueva
a l’Academia de la Llingua Asturiana. El gobiernu llingüicida y
clientelista que carez Asturies nun camuda enxamás d’estratexa: a más
represión, más sovención. Poro, hai que midir y echar cuentes enantes
de tirar volaores: ¿gana o pierde la llingua asturiana y los sos
falantes nesti xueu?, ¿qué ye más grande, el pan que prometen o’l palu
que mos dan?.

Eso suponiendo que la promesa nun acabe como l’agua nun paxu porque nun
hai qu’escaecer que:

1 u. Yá nel añu 1983 (Lletres Asturianes, númberu 9) el gobiernu
d’entós, de la mesma castra qu’ésti, prometió-y a l’Academia, asitiada
“provisionalmente” onde sigui tando ventisiete años dempués, un cambéu
darréu pa una sede digna.. ¿Quién garantiza que nun se repita la
hestoria?.

2u. Nun se pue escartiar qu’Areces ande tresnando un segundu Perlora,
nesti casu escontra la FSA (el primeru montó-ylu al PCA), y si ye
asina, los retratos y emponderamientos bien meriten promeses que, a la
postre y al cabu y si fai falta, llévales el vientu.

Xurde Blanco Puente.

P.S. Acordies colo qu’espublicen los periódicos dixitales
asturianistes, güei mesmo la llingua sangra (estos, como los foriatos
de la “Aldea perdida”, siempres tiren de navaya) per otru sitiu: Areces
truñó en Xixón escontra l’asturianu (pa elli, d’orixe andaluz, como nos
sainetes de toreros y bailaores, ye bable) y escontra la oficialidá
(nun la quieren los asturianos, porque él lo diz, non les encuestes).
Esbabayó pel movimientu llingüísticu y de dignificación d’Asturies
acusándolu de “otres connotaciones”. Fizo apoloxía del españolismu,
“pol qu’Asturies arrenunció a les sos señes d’identidá”. Ñegó toles
trampes ya indignidaes que careció’l mísere inxerimientu de la llingua
na educación, procesu del que ye máximu culpable dende peronia, cuando
yera Delegáú del Ministeriu d’Educación. Y finó pasando factura per
promeses, emponderamientos y retratos, glayando escontra lo inxusto que
ye calificalos (a elli y al so gobiernu) d’opuestos al asturianu
cuando “acaben de dignificar les instalaciones de l’Academia de la
Llingua Asturiana”.

¡Víalo un ciegu!..

  Categories:
Loading Facebook Comments ...