Verdasca queden segundos na final del Troféu “Cidrerie du Terroir”

by asturnet | agosto 11, 2007 3:45 am

[1]

El grupu Verdasca, formáu por mozos y moces de la Escuela Municipal de Música de Llanera, algamó un honrosu segundu puestu esti sábadu na final del Troféu “Cidrerie du Terroir” compitiendo con xente muncho más veterano como los escoceses de Darien Project o los ganadores, el Tríu Huiban-Miossec-Le Mentec de Bretaña, del que forma parte xente bien nomao de Lorient. Felicitaos pol xuráu les nueves promeses del folk asturianu tan amuesando munchu interés nesta la so primer visita a Lorient.

El grupu, formáu polos hermanos Joglar, Rodrigo y Andrea, Marina Pangua, LLorián García, Sara Fernández y Andrés García, ta siendo la sorpresa más positiva de la presencia destacada de la delegación asturiana en Lorient, donde los ésitos de públicu y participación siguen siendo enforma notables.

Na so participación na final del Trofeu de la marca de sidra patrocinadora del eventu amuesaron la so calidá penrriba de grupos muncho más veteranos y dafechamente profesionales nun concursu empobináu a nueves formaciones pero qu’almite a formaciones recientes de xente enforma veterano. Los mozos y les moces de Verdasca competíen nesti casu con grupos que tovieron actuando como teloneros de Capercaille o en dellos otros espectáculos del festival y con componente que tienen una llarga hestoria musical tres de sí.

Endnotes:
  1. [Image]: http://asturnews.com/bancofotos/fotos/2/3181.jpg

Source URL: http://asturnews.com/verdasca-queden-segundos-na-final-del-trofeu-cidrerie-du-terroir/