Venti redactores y fotógrafos participen nun cursu pioneru d’asturianu entamáu pol diariu ‘El Comercio’

Deprender llingua asturiana pa poder emplegala na prensa escrita. Venti redactores y fotógrafos del diariu xixonés ‘El Comercio’ empiecen el martes prósimu un cursu inéditu d’asturianu pa periodistes entamáu pol propiu mediu de comunicación, con una duración de tres meses y dos hores de clases a la selmana. El monográficu coincide con sendos cursos convocaos pola Universidá y pola Xunta pola Defensa de la Llingua.

Nel casu’l diariu xixonés -integráu nel Grupu Vocento de comunicación, antes Grupu Correo-, el cursu tien un nivel básicu y ta concebíu p’aniciar a los trabayadores del periódicu nel usu de la llingua asturiana, col envís de que llueu tean capacitaos pa emplegar esi idioma nel so llabor diariu.

El monográficu, el primeru d’estes calterístiques qu’entama un periódicu n’Asturies, tará impartíu nes propies instalaciones del periódicu pola profesora Sabel Tuñón, integrante de la comunidá educativa’l colexu xixonés Javinto Benavente, y prollongaráse hasta finales d’abril cola participación adicional d’escritores, periodistes, músicos, profesores, etnógrafos y editores, qu’illustrarán a los alumnos con charres sobro les sos respectives especialidaes.

La cellebración del cursu internu pa trabayadores del diariu ‘El Comercio’ coincide nes feches con otres dos convocatories formatives: Un cursu al rodiu de comunicación en situaciones de minorización llingüística entamáu pola Universidá d’Uviéu dientro’l so programa d’Estensión Universitaria y un monográficu formativu d’asturianu promovíu pola Xunta pola Defensa de la Llingua.