Portada Música Vendida una partitura orixinal de Mozart por 372.500 euros

Vendida una partitura orixinal de Mozart por 372.500 euros

by redacción asturnews
Foto: Montserrat Labiaga Ferrer (https://www.flickr.com/photos/montse/)

Una partitura orixinal del compositor Wolfgang Amadeus Mozart, escrita na so mocedá y procedente d’una colección de Stefan Zweig, foi vendida en París esti llunes por 372.500 euros, según informó la casa de puyes Sotheby’s. El documentu consiguió prácticamente doblar el so preciu envaloráu de salida, ente 150.000 y 200.000 euros.

Escritu a mano en 1772, cuando Mozart tenía 16 años, el manuscritu ye una versión única del quintu y sestu minueto d’una serie de seis minuetos pa orquesta, compuestos pol músicu en Salzburgo ente dos viaxes que fixo a Italia’l branu d’esi añu, según Sotheby’s. “Foi nesta dómina cuando’l so xeniu afírmase y empieza a crear numberoses obres d’arte”, destacó la subastadora.

Tratase d’una de les rares pieces que se caltienen del heriedu musical del compositor, guardáu pola so hermana Maria Anna en Salzburgo y que sieglos dempués pasó a manos de Zweig, un gran coleccionista de Mozart.

El preciosu oxetu foi puyáu hai una selmana dientro de la vienta d’un reconocíu bibliófilu suizu, Jean-François Chaponnière, fináu en 2005. El dineru de la vienta va ser destináu a fondos privaos en favor de la promoción de la música ente los mozos.

Tamién te podria gustar