‘Vamos que nos vamos’ de Muchachito Bombo Infierno, nes fiestes de San Agustín d’Avilés

L’aparcaderu del Complexu Deportivu d’Aviles va ser l’escenariu que mañana a partir de les diez de la nueche acueya, de manera gratutita, un conciertu de Muchachito Bombo Infierno. La banda lliderada por Jairo Perera presenta con esta actuación ‘Vamos que nos vamos’, el primer discu de so nel qu’entemecen sones de la rumba catalana, del swing y del reggae, con pingarates d’inspiración funky.

Jairo Perera, esperimentáu músicu de grupos como La Banda del Disfiladero, Los Tronchos o Trimelón de Naranjus, va tar acompañáu nel escenariu por El Lere (al baxu), Hector Bellino (a la batería), Josue ‘El Ciclón’ García (cola trompeta), El Tito Carlos (col pianu) y la sección de vientos de La Gigoleto Brass.

Asina, na nueche de mañana, celebrando la selmana de festeyos que conmemoren el San Agustín, los avilesinos van poder esfrutar al ritmu de canciones como ‘Si tú, si yo, si, no’, ‘Más que breve’, ‘Eima’ o ‘Será mejor’, convertíes yá en grandes esitos de Muchachito Bombo Infierno.