Valledor pon en cuestión si la Universidá ta al serviciu de la sociedá asturiana

El diputáu d’IX-BA-Verdes, Francisco Javier García Valledor, consideró en declaraciones feches esti miércoles que la decisión de la Xunta de la Facultá de Filoloxía de la Universidá d’Uviéu de suprimir la llingua asturiana como especialidá resulta “inaceptable y indignante y pon en cuestión si la Universidá ta al serviciu de la sociedá asturiana o al de los intereses falsos d’un pequeñu grupu de profesores”.

Al traviés d’un comunicáu, Valledor indicó que la universidá asturiana tien xustificación namái que tando al serviciu d’Asturies y los Asturianos. Poro, destacó que desaniciar la llingua asturiana de la enseñanza reglada na Universidá ye “inaceptable dafechu y asítiase frente a la posición del parlamentu asturianu y de la propia llegalidá vixente”.

El diputáu d’IX-BA-Verdes solicitó la inmediata intervención del rector de la Universidá d’Uviéu pa que se corrixa esta situación que considera “absurda ya incomprensible”, asina como la del conseyeru d’Educación, José Luis Iglesias Riopedre.