Portada Emigración Valledor llamenta que’l PSOE asturianu nun pida la nacionalidá pa los nietos d’emigrantes como fizo Touriño en Galicia

Valledor llamenta que’l PSOE asturianu nun pida la nacionalidá pa los nietos d’emigrantes como fizo Touriño en Galicia

by asturnet

El conseyeru de Xusticia Francisco Javier García Valledor, responsable n’Asturies de los temes d’Emigración, “llamenta” que dengún home importante del PSOE asturianu fale de la necesidá de reconocer la nacionalidá a los nietos d’españoles nel esterior nel proyectu de llei que se ta discutiendo, tal y como ficieron los socialistes gallegos na so comunidá y como prometiere’l presidente del Gobiernu español nel so programa electoral.

‘Llamento que’l proyectu del Estatutu de los Españoles nel Esterior nun tuviere la valentía de reconoce-yos la nacionalidá a los nietos d’españoles, un problema de fondu de la emigración’ española y, por supuesto, asturiana, dixo’l conseyeru de Xusticia, Seguridá Pública y Rellaciones Esteriores del Principáu. ‘Trátase d’una cobardía impropia d’un gobiernu que se diz d’izquierdes’, añedió.

Énte los periodistes acreditaos nel III Congresu Mundial d’Asturianía, Valledor dixo tres de los discursos d’inauguración qu’echaba en falta n’ellos ‘un pronunciamientu asomeyáu al de Galicia’, onde’l so presidente, Emilio López Touriño, ‘espresó con claridá y rotundamente que l’Estatutu de los Ciudadanos Españoles nel Mundu ye un pasu alantre que va dar pasu incompletu si nun mete’l reconocimientu de la nacionalidá pa los nietos de los emigrantes españoles nel mundu, un elementu fundamental que, amás, foi una promesa ellectoral del actual presidente del Gobiernu d’España’.

Valledor señaló que ‘ye fundamental que se recueya na llei porque, rialmente, nun s’entiende por que los nietos de los españoles nel mundu tienen un tratu diferente de los nietos de los italianos o de los nietos d’otros ciudadanos de la Unión Europea’. El conseyeru espera qu’esta falta s’arregle nel trámite parlamentariu.

Tamién te podria gustar