Valledor desvela que les inversiones en La Llaboral dupliquen les previstes nel Muséu de Belles Artes

Les inversiones culturales en La Llaboral dende 2004 acérquense a los 63 millones y mediu d’euros (63.404.292,94 euros en concretu) y non los 29.500.000 de los que fala la Conseyera de Cultura. Esos datos obtiénlos el diputáu d’Izquierda Xunida y voceru del so grupu parllamentariu en materia de cultura, Francisco Javier García Valledor, de restar al conxuntu de les inversiones feches hasta la fecha nesi centru, les que nun tán dafechu rellacionaes coles infraestructures culturales. A xuiciu del diputáu estes inversiones comprenden les desenrrollaes nel Centru d’Arte, el Teatru, el nuevu Centru de Formación Profesional, que Valledor recuerda que se tuvo de treslladar del so anterior asitiamimentu pa poner nel so llugar el Centru d’Arte, y les inversiones que resulten necesaries pal funcionamientu d’esos espacios. Valledor indicó que nun se incluyó n’esta cantidá les partíes referíes al vieyu conventu de Les Clarises, empobinaes a la sede de la RTPA, los trabayos de rehabilitación de la Torre, los de cubrición del Patiu Corintiu d’accesu al edificiu principal, l’Institutu d’Educación Secundaria, la rehabilitación de fachaes, los espacios destinaos a usos universitarios, los nuevos despachos del Principáu d’Asturies, la rehabilitación de los xardines y les obres del nuevu aparcamientu. “Anque La Llaboral ye un tou y se podríen perfectamente incluyir munches d’eses inversiones, colo que la cifra final ampliaríase nunes cuantes decenes de millones d’euros, queremos ser rigurosos pa poder determinar con oxetividá la evidente diferencia de tratu del Gobiernu d’Asturies nes inversiones culturales ente Uviéu y Xixón”, solliñó’l diputáu.

“Precisamente porque se trata de comparar esfuercios d’inversión homoxéneos nel mesmu ámbitu nun s’esplica que la Conseyera de Cultura incluyere les inversiones previstes tanto nel Muséu Arqueolóxicu d’Uviéu y l’Archivu Hestóricu que nos convenios firmaos nel añu 1995 y que tovía anguaño nun vemos inaugurase, y qu’amás se trata d’inversiones del Estáu, non del Gobiernu d’Asturies”, declaró Valledor. Per otra parte’l diputáu recordó que no que cinca al Muséu de Belles Artes, el Presidente del Principáu yá presentare’l so proyectu d’ampliación, “que denomó la milla d’oru d’Uviéu” en 1999, cuatro años enantes de que s’entamare’l proyectu de La Llaboral güei yá en funcionamientu, mientres que les obres d’ampliación del Muséu acaben d’entamar.

Per otra parte’l coordinador d’Izquierda Xunida d’Uviéu, Alejandro Suárez, recordó tamién que, más allá de les inversiones culturales, la diferencia del esfuerciu del Gobiernu d’Asturies nel sofitu a les actividaes culturales organizaes n’Uviéu y Xixón ye abislmal y no se correspuende con nengún criteriu razonable. Suárez desveló que, por exemplu nel Presupuesto de la Conseyería de Cultura destínense 3 millones d’euros a financiar los proyectos de Llaboral Escena, lo que contrasta colos 240.000 euros que se destinen a la Opera d’Uviéu. “Dalguién tendría qu’esplicar esa diferencia sobre manera teniendo en cuenta qu’hebo más publicu nuna sola función del Campoamor que en toles actividaes de Llaboral Escena dende la so inauguración”, señaló.